Македонија

Отфрлена жалбата за декларацијата на Советот на Благоевград против македонскиот клуб „Никола Вапцаров“

Прогласувањето на македонската нација за вештачка во декларацијата не било дискриминација врз основа на убедување и етничка припадност

Административниот суд од Благоевград ја потврди одлуката на Комисијата за заштита од дискриминација во врска со декларацијата на Советот на Општината против отворањето на македонскиот културен клуб „Никола Вапцаров“, оценето во неа како антибугарска манифестација.

Декларацијата беше усвоена од општинските советници на 7 октомври 2022 година со 25 гласа „за“, 4 „воздржани“ и ниту еден „против“ и во неа се нагласува дека за општинските советници бил „неспорен историски факт оти македонската нација била вештачки создадена во 1934 година, дека единствената причина за нејзиното постоење била да ѝ служи на интересите на болчевичката партија, на Советскиот сојуз и на целите на туѓа држава“.

„Уште повеќе, за нас како Бугари и жители на Пиринска Македонија е исклучително голема навреда и провокација на еден голем бугарски поет како Никола Вапцаров да му се насадува туѓ национален идентитет. Водени од сето тоа, ние од Советот на Општина Благоевград сметаме дека создавањето на конректниот центар во нашиот град е груба провокација и демонстрација од страна на нелегитимни организации за нашето право“, се додава во декларацијата, во која се оценуваат како „грубо газење на Уставот и на законите на Бугарија сите дејства за создавање организација во која група луѓе се самоопределуваат како ‘малцинство’ во нашата национална држава“.

И покрај декларацијата на општинскиот совет, клубот беше отворен на 30 октомври таа година во присуство на тогашниот лидер на македонската опозиција, а сега премиер Христијан Мицкоски, како и на претставници на кабинетот на претседателот.

„Целта на идејата е да изградиме мост меѓу бугарскиот и македонскиот народ преку границата, сакаме да поминуваме без граници во преносна смисла. Финансирањето на клубот е од наши сонародници од Канада. Многу улици го носат името на Никола Вапцаров, тој е јавна личност и не би требало да има проблеми со тоа“, изјави Атанас Мазнев, еден од иницијаторите за отворањето на клубот, кој постоеше осум месеци, по што сопственичката на просторот одби да го продолжи истечениот договор за наем од 300 лева (150 евра – н.з.) месечно.

Во март 2023 година Мазнев и соработниците поднесоа жалба до Комисијата за заштита од дискриминација за антимакедонската декларација на Советот на Благоевград, која таа ќе ја одбие на 5 септември 2024 година со образложение дека не е извршена дискриминација врз основа на убедување и етничка припадност.

Одлуката на Комисијата е обжалена пред Административниот суд во Благоевград, кој ја отфрли како неоснована, а против решението на судијата Димитар Думбанов може да се вложи жалба до Вишиот административен суд.

Најнови вести од: Македонија

Касами: Не стојам зад Хаќим Рамадани и не го поддржувам во Брвеница, оти предизвика етничка поделба

Градоначалникот на Тетово и лидер на Движењето Беса Билал Касами во интервјуто, дадено за ТВ Алсат, нагласи дека на прагот на вториот круг на локалните избори на 2 ноември тој и коалицијата Вреди не ги поддржуваат ниту Фатмир Дехари како кандидат на ДУИ за градоначалник на Кичево, ниту Хаќим Рамадани како кандидат на Вреди за претседател на општина Брвеница.

Ѓорѓиевски: Левица е во коалиција со ДУИ, се виде уште од првиот круг, тоа го потврдуваат сега и фотографиите!

„Левица имала поддршка од ДУИ уште во првиот круг на локалните избори.“ – нагласи кандидатот за градоначалник на Град Скопје Орце Ѓорѓиевски во вечерашната емисија „На дуел кај Иван“ на Канал 5 телевизија.

Касами: Дехари не донесе ништо добро во Кичево, не можеме да застанеме зад него само оти е Албанец!

Билал Касами, тетовскиот градоначалник и лидер на Беса, од коалицијата Вреди, во интервјуто за ТВ Алсат посочува дека „намерата не била да се поддржи ниеден кандидат, поради етничка припадност, туку врз основа на морални вредности и политички перформанси“.

Судот одреди 30 дневен притвор за Рустеми и Саити

Основниот кривичен суд Скопје го усвои предлогот на Основното јавно обвинителство Скопје и одреди притвор во траење од 30 дена за двајца раководители од ЈП „Комунална хигиена“ – Скопје, поради основано сомневање за кривичното дело „Загрозување на животната средина и природата со отпад“ од член 230 став 1 од Кривичниот законик.

Паника во Скопје и Куманово по дојави за бомби

Во неколку основни училишта во Скопје и Куманово вечерва на електронските адреси пристигнале пораки за наводно поставени експлозивни направи, информира МВР. Полицијата веднаш изврши проверки, а учениците се безбедно евакуирани.

Мециновиќ: Вториот круг ќе охрабри многу луѓе да излезат и да гласаат

Кандидатот за градоначалник на Град Скопје од Левица, Амар Мециновиќ, во телевизискиот дуел со Орце Ѓорѓиевски од ВМРО-ДПМНЕ, ја анализираше ниската излезност на гласачите во првиот круг од локалните избори 2025 година, истакнувајќи дека коренот на проблемот лежи во длабоката недоверба на граѓаните во можноста за вистински политички промени.

Ѓорѓиевски: Досега немало разлика од 60.000 гласови меѓу противкандидати на локални избори

Кандидатот за градоначалник на Скопје од редовите на ВМРО-ДПМНЕ, Орце Ѓорѓиевски, за време на вечерната дебата со својот противкандидат Амар Мециновиќ од Левица на телевизија Канал 5, изјави дека не триумфирал во првиот круг од локалните избори поради ниската излезност на граѓаните

To top