Македонија

По 20 години нова биста на народниот херој Стив Наумов пред студентскиот дом во Скопје, кој го носи неговото име

Еден месец по отворањето на темелно реновираните објекти, во студентскиот дом „Стив Наумов“ во скопска Автокоманда поставена е и биста на народниот херој по кого е именуван домот, речиси две децении откога е украдена претходната. Бистата официјално беше откриена денеска во присуство на претставници од Сојузот на борци од НОВ, кои положија цвеќе пред споменикот на Стефан Стив Наумов (1920 – 1942), роден на денешен ден пред 106 години.

Министерството за образование одговори на иницијативата на Димитар Бојков, внук од сестра на херојот Наумов, да се направи и постави нова биста, во соработка со Општинската организација на Сојузот на борци од НОБ – Гази Баба и раководството на Државниот студентски дом „Скопје“. Бојков рече дека домот го носи името на Стив Наумов откога е изграден, а тогаш имало и споменик во кругот на домот.

– Бистата беше украдена, а основата почна да се оштетува. И покрај многубројните ургенции, споменикот не се обновуваше. Најчест одговор беше поради немање пари. Сега, со реновирање на домот, благодарение на Владата на Македонија и Министерството за образование и наука, споменикот е обновен. По тој повод, од име на најблиските роднини на Стив, упатувам посебна благодарност до министерката за образование и наука, Весна Јаневска, и до нејзините соработници Игор Крстевски и Роберт Аџи Петров, за нивното несебично залагање за обезбедување пари и обновување на споменикот. Вајарот Далибор Николовски-Дачо успеа за релативно кратко време да изваја една од најавтентичните бисти на Стив – изјави Бојков.

Претседателот на Општинската организација на Сојузот на борци од НОБ – Гази Баба Трајче Георгиевски, нагласи дека со ова се чествува роденденот на народниот херој, кој загинал на неполни 22 години. „По 20 години повторно е ставена бистата на Стив Наумов. Ние се грижиме за минатото, особено за спомениците и ова е последен споменик од 26-те обележја во Гази Баба, Петровец, Илинден и Арачиново, што успеавме да го обновиме, Најмногу успеа Димитар Бојков, со неговото трчање и со нашите пишувања и барања. Сите треба да ги чуваме спомениците на луѓето кои ги дале животите за нашата слобода. Да го паметиме минатото, затоа што без минато нема иднина.“ – порача Георгиевски.

Директорот на Државниот студентски дом „Скопје“, Александар Каровски, се заблагодари до МОН и до Владата за создадените услови да се постави нова биста и истакна дека овој чин покажува како се негува традицијата и како се почитуваат народните херои кои ги жртвувале своите животи за слободата.

Во врска со некои поплаки од студенти и обвинувања од опозицијата за прокапување во домот, директорот Каровски рече дека се соочуваат со ситни проблеми и оти прокапувањето било предизвикано од затнувања. – Водата кога протекува главно е од затнување. Имавме проблем со фрлени влажни марамчиња, од коса итн. Тоа се случува, ние ги санираме. Објектот има 18 години гаранција, како и целата опрема. Пријавуваме до проектната единица, доаѓаат изведувачите и ги санираат тие тековни проблеми. Нормално е во толку големи објекти да има некои ситни проблеми. Апелирам и до студентите дека треба да внимаваат на куќниот ред и на правилникот. Имаат потпишано договори и треба да го чуваат сето тоа што тука е инвестирано, зашто во спротивно ќе мора да одиме со санкции – изјави Каровски.

Тој додаде дека во „Стив Наумов“ е исполнет сместувачкиот капацитет – 1.014 студенти има во зградите и 138 во бараките, кои беа реновирани пред 15-ина години, и се во склоп на студентската населба. Покрај собите во кои се сместени, студентите имаат на располагање читалница, менза и други заеднички простории.

Најнови вести од: Македонија

Николоски од Виена: Реализираме инфраструктурни проекти вредни до 6 милијарди евра

Николоски нагласи и дека на Македонија ѝ се потребни меѓународни пријатели и силни партнерства, додавајќи дека преку ваквите форуми се создаваат можности за нови форми на институционална соработка со европските партнери.

(Фото): Ова е најтешкиот буџет, се враќаат две милијарди евра, ќе има и поголеми плати, најави министерката за финансии

Јавниот долг заклучно со третиот квартал годинава, според податоците од Министерството за финансии, изнесува 10 милијарди 930 милиони евра или 56,6 проценти од БДП. До крајот на годината, во согласност со сегашните проекции, би требало да изнесува 11.250 милиони евра или 58,2 проценти од БДП, а државниот долг да биде 51 процент.

Уставни измени во 2001: Треба да се спречи Македонија и целосно да ја изгуби својата „македонска душа“ како држава! (3)

Ноемвриските уставни амандмани од 2001 година „инсталираа“ „фабрички дефект“ во функционирањето на политичкиот систем преку воведувањето на „консензуалната“, „договорна демократија“, предвидена да ја практикуваат „етничките поглавари“ на Македонците и Албанците. Експертите посочуваат дека таквата „договорна демократија“ ја претвори Македонија во непрогласена „двонационална држава“ со „отворена перспектива“ наместо унитарна држава да стане и „двокантонална федерација“, или можеби и конфедерација. Сегашната претседателка на Република Македонија Гордана Силјановска-Давкова учествувајќи на една научна расправа во МАНУ пред 19 години, тогаш како професорка по уставно право и уставен систем, констатираше дека „во 2001 година врз македонската држава беше спроведен рамковен и уставен инженеринг во режија на меѓународната заедница“. Силјановска-Давкова уште тогаш имаше изнесено предупредување дека е реална заканата „Македонија да стане ‘држава без душа’ (‘soulles state’).

Мицкоски за ужасниот напад врз девојката во Охрид: Жестоко го осудувам ова дивјаштво! – Сѐ ќе сториме сторителот да одговара пред правда!

Премиерот Христијан Мицкоски упати остра осуда за нападот врз младата девојка во Охрид, изразувајќи поддршка до нејзиното семејство, ветувајќи дека институциите ќе сторат сè сторителот да биде изведен пред лицето на правдата.

Врвни светски експерти предупредуваат дека со уставните измени од 2001 Македонија може да стане „македонско-албанска држава“! (2)

На 16 ноември 2001 година Собранието на Македонија ги прогласи 15-те амандмани на уставот, кои произлегоа врз основа на Охридскиот рамковен договор од 13 август 2001 година. Амандманите 4, 5, 6, 7, 8, 9, 10, 11, 12, 13, 14, 15, 16 и 17 станаа составен дел на највисокиот правно-политички акт на Македонија. Овие 15 амандмани на уставот на Македонија од 16 ноември 1991 година означија длабоки и суштински, би се рекло тектонски промени во уставниот поредок и политичкиот систем на државата. Македонија престана да биде национална држава на македонскиот народ. Првпат во историјата на конституционализмот е сменета една преамбула без да се донесе нов устав. Во новата преамбула, наметната со масивната надворешна интервенција на меѓународниот чинител, беа ревидирани историската меморија и историската вистина за државотворноста на македонскиот народ, потврдена со одлуките на Првото заседание на АСНОМ од 1944 година. И не само тоа: тие уставни промени од 16 ноември 2001 година, нагласуваат уставните и други експерти во своите научни студии, можат да бидат причина во одредени услови сегашното унитарно државно устројство да биде заменето со бинационален државен концепт, македонско-албански.

Пецаков: Најостро го осудувам насилниот настан што го потресе Охрид, ги повикувам надлежните институции да постапат

„Најостро го осудувам насилниот настан што го потресе Охрид во текот на вчерашниот ден. Како личност и како градоначалник згрозен сум, Охрид е згрозен! “ – објави попладнево градоначалникот на Охрид на својот фејсбук-профил во врска со случајот на претепаната и тешко повредена девојка, која била оставена во без свест на улица пред маркет во Охрид, откако, според пријавените информации, била физички нападната од нејзиното момче. По инцидентот, таа итно била пренесена во болница, каде што била задржана на лекување, а осомничениот е приведен. За случајот, полицијата го лиши од слобода 31-годишниот Х.К. од Охрид.

Лиав Оргад и Виолета Ачковска: Уставните измени од 2001 ја “избришаа“ Македонија како национална држава на македонскиот народ, но и придобивките од АСНОМ! (1)

 На 16 ноември 2001 година Собранието на Македонија ги прогласи 15-те амандмани на уставот, кои произлегоа врз основа на Охридскиот рамковен договор од 13 август 2001 година. Амандманите 4, 5, 6, 7, 8, 9, 10, 11, 12, 13, 14, 15, 16 и 17  станаа составен дел на највисокиот правно-политички акт на Македонија. Овие 15 амандмани на уставот на Македонија од 16 ноември 1991 година означија длабоки и суштински, би се рекло тектонски промени во уставниот поредок и политичкиот систем на државата. Македонија престана да биде национална држава на македонскиот народ. Првпат во историјата на конституционализмот е сменета една преамбула без да се донесе нов устав.

To top