Пожар попладнево избувна на падините на планината Петрино, во непосредна близина на охридската населба „Бараки“, во северниот дел од Охрид.
Веднаш по пријавата, на местото на настанот се упатени три екипи на Територијалната противпожарна единица од Охрид, кои работат на локализација на огнот.
Сепак, силниот ветер значително ја отежнува интервенцијата и придонесува пожарот брзо да се шири. Надлежните работат на ангажирање на дополнителни противпожарни екипи и ресурси за да се спречи понатамошното ширење на огнената стихија.
Засега не се познати причините за избувнувањето на пожарот. Официјална потврда ќе има по завршувањето на увидот, иако според досегашното искуство, најголемиот дел од ваквите пожари се последица на човечки фактор.
Ситуацијата се следи, а граѓаните се повикуваат да бидат претпазливи и да го пријавуваат секој сомнителен случај.