Кандидатот на ВМРО-ДПМНЕ за градоначалник на Брвеница, Стојанчо Радичевски, повика во вториот круг в недела да се гласа без оглед на етничката или политичка припадност, бидејќи општината им припаѓа на сите нејзини граѓани.
„Сакам да бидам јасен, оваа општина не припаѓа на една партија, ниту на една етничка заедница. Брвеница е на сите што живеат овде во Брвеница, Седларце, Стенче, Волковија, Блаце, Милетино, Радиовце, Челопек и Гургурница, на сите без исклучок. Никој не треба да биде исклучен, потценет или заборавен, ќе продолжиме да живееме едни покрај други, да ги споделуваме истите предизвици и да работиме за подобра иднина. Нашето заедништво е вредност што треба да го чуваме. Брвеница има потреба од дијалог, меѓусебна почит и заедничка одговорност. Македонци, Албанци, Турци и припадници на сите други заедници треба да имаат еднакви можности, достоинствени услови за живот и перспектива на своите семејства. Нашата визија треба да биде насочена кон иднината, кон развојот, кон конкретни резултати. Развојот на општината не смее да познава поделби. Секое населено место заслужува внимание, секој граѓанин заслужува почит, а секоја добра идеја заслужува поддршка“, порача Радичевски пред насобраните на вечерашниот митинг.
Радичевски во првиот круг пред две седмици освои 2.945 гласа или 38,90 проценти, а противкандидатот в недела Аркин Јахији од НАИ/ДУИ доби 2.152 гласа или 28,45 отсто.