Заменик министерката за животна средина и просторно планирање, Ане Лашкоска, во рамки на повеќе панел дискусии, говорела на Вториот годишен министерски состанок за Зелената агенда за Западен Балкан, кој се одржува од 14 до 15 октомври 2025 година во Дубровник, Република Хрватска, објавија од министерството за животна средина.
На состанокот учествуваат министри од сите земји од Западен Балкан, претставници на Европската комисија, земјите-членки на ЕУ, регионални организации, меѓународни партнери и граѓанското општество.
Главната цел на настанот е да се процени напредокот на Зелената агенда за регионот и да се утврдат конкретни мерки за следната фаза од нејзината имплементација.
Учесниците во Дубровник изгласале Декларација со која се зајакнува регионална координација за усогласување со Европскиот зелен договор. Наменската сесија за координација и финансирање на донаторите ќе се фокусира на инвестициските потреби и можностите за забрзување на зелената транзиција на регионот.
Во своето обраќање, Лашкоска потенцирала дека Македонија ја гледа зелената трансформација како процес кој влијае директно врз квалитетот на животот на граѓаните. Таа истакнала дека државата, во рамки на своите финансиски капацитети, континуирано вложува во чист воздух, заштита на реките и шумите, управување со отпадот и во едукацијата на младите, како клучни активности кои овозможуваат реално подобрување на животната средина.
Министерството за животна средина и просторно планирање, според нејзините зборови, не само што ги усогласува своите политики со европските стандарди, туку активно учествува во регионалната соработка со цел воспоставување на практични и ефективни решенија за заштита на природата.
Дискусиите исто така се фокусираа на финансирањето и инвестициските потреби за забрзување на овие процеси, со цел земјите од Западен Балкан да можат да ги реализираат своите проекти за одржлива енергија, инфраструктура и зачувување на природните ресурси, се вели во информацијата од Министерството за животна средина.
Лашкоска подвлекла дека успешната имплементација на Зелената агенда зависи од активно вклучување на граѓаните, особено младите, преку едукација и практични акции за заштита на животната средина. Таа истакнува дека овие иницијативи не само што го подобруваат квалитетот на животот, туку и создаваат култура на одговорност кон природата и идните генерации.
„Нашата држава останува посветена на создавање одржлива и чиста животна средина. Нашата работа се темели на конкретни политики, регионална соработка и активно вклучување на граѓаните, со цел забрзан, но одржлив економски развој и заштита на биодиверзитетот и природата за идните генерации“, порачала Лашкоска во еден од своите настапи.
Настанот во Дубровник, покрај размена на искуства и стратегии за регионално справување со пластичниот отпад и климатските промени, ја потврдила и посветеноста на нашата држава и целиот регион, да работат заедно на конкретни мерки и проекти кои обезбедуваат зелена и одржлива иднина.
Министерството за животна средина и просторно планирање продолжува со целосна посветеност на зелените политики и климатската отпорност, градејќи основа за одржлив развој кој долгорочно ќе обезбеди почиста, поздрава и поодржлива животна средина за сите граѓани, се вели во соопштението од министерството за животна средина и просторно планирање.