Благодарение на брзата реакција на надлежните служби, повреден планинар е успешно лоциран и евакуиран од планинскиот терен во Националниот парк Маврово.
По пријава преку Единствениот број за итни повици 112, Центарот за управување со кризи – Регионален центар Тетово веднаш остварил координација со СВР Тетово, Полициската станица Маврово и Јавното претпријатие Национален парк Маврово.
Ренџерите од Националниот парк успешно го лоцирале повредениот планинар, кој бил во стабилна состојба. Потоа започнало негово безбедно спуштање кон селото Жужње, каде бил преземен од екипа на Итната медицинска помош од Гостивар и транспортиран за понатамошен медицински третман.
„Благодарение на брзата реакција и навремената координација на сите надлежни служби, повредениот планинар е безбедно евакуиран и во стабилна состојба“, соопшти вечерва Центарот за управување со кризи.