„ЕУ е силно фокусирана на спроведување на енергетските планови и постигнување на целите, и во оваа смисла би сакал да ѝ честитам на С.Македонија за усвојувањето на енергетската стратегија и план и за напредокот што го постигна во планот за праведна транзиција.
Ваквите напори се особено важни, многу реформи веќе се спроведуваат, преку рамката на Енергетската заедница, и тие силно ќе го обликуваат патот кон членство во ЕУ“.
Ова го изјави амбасадорот на ЕУ, Михалис Рокас, во својот говор на регионалниот форум за клима, енергетска транзиција и одржлив развој во Западен Балкан – MEF 2026.
Тој додаде дека за Македонија, реформите се приоритет, усвојувањето на законодавството за обновливи извори, како и заштитата на ранливите категории граѓани.
„Нема сомнение дека мора решително да одговориме на енергетската безбедност со која се соочуваат регионот и Европа. За нас, двете работи, климатската транзиција и енергијата, се поврзани и неопходни, меѓу другото, поради оскудните енергетски ресурси што ги има на располагање Европа“, рече Рокас.
Тој нагласи дека европскиот пејзаж претрпува големи промени поради геополитичките и стратешките перспективи, и затоа се менува енергетската перспектива.
Во истиот контекст премиерот Христијан Мицкоски, синоќа објави дека на претстојниот самит ЕУ-Западен Балкан во Тиват, ќе презентира иницијатива со која земјите од Западен Балкан можат да станат значаен производител и снабдувач на чиста енергија за Европа.
„Соочен со растечката глобална побарувачка за електрична енергија, особено поради развојот на вештачката интелигенција и центрите за податоци, нашиот регион има потенцијал годишно да обезбедува околу 260 TWh нова обновлива енергија“, напиша Мицкоски во објава на својот Фејсбук профил.
Тој истакнува дека ова претставува можност за создавање бизнис вреден околу 26 милијарди евра годишно и шанса Западен Балкан да се позиционира како важен партнер во енергетската иднина на Европа.