Социјалдемократскиот сојуз на Македонија (СДСМ) денеска ќе го одржи својот 31. конгрес, на кој централна тема ќе бидат остварените резултати на локалните избори, на кои партијата освои само шест градоначалнички места наспроти 56 на владејачката ВМРО-ДПМНЕ.
Партиски извори брифираат дека највисокото тело на партијата на власт на државно ниво до предминатата година ќе има седница од отворен и од затворен тип.
Во отворениот дел лидерот Венко Филипче ќе одржи поздравен и воведен говор, а потоа ќе следува затворениот дел од конгресот, во кој генералниот секретар и шеф на изборниот штаб Александар Саша Димитриевиќ ќе го претстави извештајот за изборите.
Во план е да се гласа за доверба на Централниот и на Надзорниот одбор, како и да се направат измени во Статутот заради воспоставување нови дигитални платформи за комуникација со членството и со гласачите.
Филипче очекува учесниците на конгресот да изнесат конструктивни критики, но не и да се прелеат тензиите од деновите непосредно пред одржувањето, во кои јавно го критикуваа поранешните партиски „перјаници“ Петре Шилегов и Јован Деспотовски.
Двајцата „фронтмени“ на незадоволните во партијата не се меѓу 740 поканети, исто како и експретседателот Бранко Црвенковски, кој го замрзна своето членство, а од поранешните лидери покани добија Зоран Заев и Владо Бучковски.
Партијата веќе неколку години е во состојба на внатрешни превирања што почнаа по оставката на Заев поради лошиот резултат на локалните избори во 2021 година, се засилија на парламентарните избори во 2024, кога СДСМ освои само 15 пратенички мандати и кулминираа на локалните лани, кога „државотворците“ се сведоа на петта политичка сила во Скопје и трета во Македонија.