Шведско-македонската стопанска комора денеска го поздравува официјалниот почеток со работа на компанијата „Dori Care“ или Дори Грижа во Гостивар. Свеченото отворање се одвиваше преку целодневна програма во терминот од 09:00 до 16:00 часот во просториите на компанијата, каде што присуствуваа високи претставници на Комората, вклучително и директорот Самуел Наумовски Викиус и благајникот Сашко Трајков. Тие преку своето присуство ја истакнаа поддршката за оваа иницијатива како значаен пример за имплементација на шведските стандарди и деловни практики на македонскиот пазар.
Под раководство на директорката Мелахате Исаи, „Dori Care“ на пазарот нуди специјализирани услуги за домашна нега на стари лица, кои се целосно персонализирани според индивидуалните потреби на корисниците. Дејноста на компанијата опфаќа широк спектар на активности, започнувајќи од асистенција при остварување на основните животни потреби како исхрана, облекување и одржување на лична хигиена, па сè до грижа за домаќинството преку услуги за чистење и перење.
Покрај физичката асистенција, компанијата става силен акцент и на социјалниот аспект на живеењето, обезбедувајќи неопходно друштво, како и социјална и психолошка поткрепа за корисниците. Дополнителни услуги вклучуваат и помош при планирање на дневни и рекреативни активности, со цел подобрување на квалитетот на животот на старите лица.
„Dori Care“ располага со високо професионално обучен персонал и нуди флексибилно работно време кое се креира врз основа на специфичните барања на клиентите. Отворањето на „Dori Care“ претставува продолжување на успешната економска соработка помеѓу Шведска и Македонија, преку која ќе се имплементираат скандинавските стандарди за квалитетна и достоинствена грижа за старите лица