Претседателката на Република Северна Македонија Гордана Сиљановска-Давкова денеска учествува на Лидерскиот самит во рамките на 31. Конференција на страните (COP31) на Рамковната конвенција на Обединетите нации за климатски промени, која се одржува во Анталија, Турција.
Таа ја предводи државната делегација а е придружувана од министерот за животна средина и просторно планирање Муамет Хоџа и министерката за енергетика, рударство и минерални суровини Сања Божиновска.
,,Свечено отворање на Светскиот лидерски самит во рамките на 31. Конференција на страните #COP31 на Конвенцијата на Обединетите нации за климатски промени.
Благодарност до Република Турција и претседателот Реџеп Таип Ердоган за топлото гостопримство и организацијата на овој значаен Самит, на којшто ќе имаме можност да размениме мислења за глобалните климатски предизвици и потребата од посилна меѓународна соработка во справувањето со нив”, објави Сиљановска-Давкова од Анталија.
На самитот се очекува Сиљановска-Давкова да се обрати на првата општа сесија наменета за шефови на држави и влади, како и да учествува во дијалог за транзиција кон чиста енергија и електрификација. Планирани се и билатерални средби со други лидери.
Фокусот на COP31 е ставен на забрзување на намалувањето на емисиите, климатското финансирање, справувањето со екстремни временски настани и претворањето на претходните обврски во конкретни и мерливи активности.
Во пресрет на конференцијата, на 30 октомври, претседателката се обрати на „Националниот дијалог во пресрет на COP31“, организиран од УНДП во соработка со ресорните министерства. Таа порача дека Македонија мора климатските обврски да ги претвори во конкретни инвестиции и мерливи резултати, со јасни национални приоритети, подготвени проекти и прецизно дефинирани потреби за финансирање.
Сиљановска-Давкова ја оцени климатската криза како системска, која влијае врз целото општество, а не само како еколошко прашање. Потсети дека земјата се наоѓа во Медитеранот – еден од најранливите региони во светот. Според извештајот на Светската банка, загубите од катастрофи и екстремни климатски настани во последните 20 години се проценуваат на околу 667 милиони долари, а без инвестиции во адаптација годишните штети би можеле да достигнат 4 проценти од БДП до 2050 година. Таа посебно ја нагласи потребата од брзо усвојување на Законот за климатска акција, за кој Европската комисија дала позитивно мислење за усогласеност со европското законодавство.
Непосредно пред COP31, вчера (10 ноември) претседателката учествуваше на деветтото издание на Парискиот мировен форум во Франција. Таа се обрати на панел-дискусијата „Одбрана на линијата: Суверенитет во ера на хибридни закани“, каде што меѓу другото порача дека Европа не може да биде целосна без стабилен и демократски Западен Балкан и дека европската безбедност е неразделно поврзана со безбедноста на регионот. Нагласи дека земјата има кандидатски статус 21 година и 17 позитивни извештаи, но сè уште не ги започнала преговорите.
Истата вечер Сиљановска-Давкова присуствуваше на свечената вечера во Елисејската палата, приредена од францускиот претседател Емануел Макрон во чест на шефовите на држави и влади – учесници на Форумот. Таа беше пречекана од Макрон (заедно со Брижит Макрон), а разговорите продолжија во пријателска атмосфера, со осврт на темите за мир и геополитика, животна средина, нови технологии и иднината на Европската Унија.
Учеството на COP31 претставува продолжение на македонските напори за активна улога во глобалните климатски процеси и енергетската транзиција, во контекст на европските интеграции и регионалната стабилност.