Предметот за пожарот во дискотеката „Пулс“ во Кочани, согласно АКМИС-системот, е распределен на понатамошно постапување кај судијата Диана Груевска Илиевска од одделот за Кривично полнолетни, соопштија од Основниот кривичен суд Скопје. Судијата Груевска Илиевска има 19-годишно судиско искуство во сите оддели на Основниот суд, како и претходни 17 години стаж како стручен соработник, што ја прави соодветен избор за постапување по овој сложен предмет, велат од Судот.
Судијката Диана Груевска-Илиевска пред години во изјава во Академијата за судии се изјасни дека лично таа и судиите во Македонија не чувствуваат политички или бизнис притисоци, туку единствено притисоци од новинарите. Таа го осуди новинарот Томислав Кежаровски на 4,5 години затвор по што следуваа реакции од домашни и меѓународни здруженија на новинари и организации за заштита на слободата на мислата.
Груевска Илиевска заедно со поранешниот претседател на Основниот кривичен суд Скопје, Владимир Панчевски не дозволуваше тогашното СЈО да истражи кој прислушувал, сеедно дали забранува истрага во телекомуникацискиот оператор или го кочи судењето за „Пуч“, a каде единствениот сведок што сакаше да го распита СЈО беше експремиерот Никола Груевски, кој тврдеше дека прислушувале странски служби во жолти комбиња.
Апелациониот суд Скопје во 2017 кога го врати случајот „Поткуп“ на повторно одлучување во Основниот кривичниот суд, најде и незаконско постапување од страна на судијката Диана Груевска Илиевска. Во овој случај беше обвинет поранешниот премиер и градоначалник на Струмица, Зоран Заев кој одговараше дека во својство на градоначалник на Општина Струмица од струмички бизнисменпобарал поткуп од 160 илјади евра, за градежно земјиште во Струмица.
Судијката Дијана Груевска Илиевска со новиот распоред на тогашниот претседателот на Основниот кривичен суд, Иван Џолев пред неколку години беше префрлена да суди во кривичниот оддел за полнолетни.
„Ја користам приликата да се простиме. Доста јас ве малтретирав“, му рече по ваквата одлука Груевска Илиевска на Заев.
Таа го водеше и предметот во кој на експремиерот Владо Бучковски му се судеше за резарвните тенковски делови во АРМ.
Инаку судот денес во целост го прифати обвинителниот акт за пожарот во Кочани.