Инцидент во штипскиот Основен суд. Нападната е полицајка во моментот кога од судската сала се изнесувале осомничените за убиството на 25-годишниот Енес Оздемири од Турција. Вистинската драма се случила во ходникот, токму кога никој не очекувал – додека петмината осомничени, под силно полициско обезбедување, биле изнесувани од судската сала.
Мајката на еден од осомничените, 52-годишна турска државјанка која го следела процесот, го изгубила трпението и се нафрлила врз полициската службеничка, влечејќи ја за косата. Инцидентот ги вознемирил сите присутни, бидејќи ретко се случува полициски службеник да биде нападнат пред судското обезбедување, и тоа во момент на изнесување обвинети за тешко кривично дело.
„Дрско, планирано убиство со умисла“ – почна судењето за убиството на турскиот државјанин во Штип
Полицијата веднаш реагирала, а 52-годишната турска државјанка е приведена. Од МВР го потврдија случајот.
„Вчера, во 12:35 часот во Штип, полициски службеници од СВР Штип ја лишија од слобода 52-годишната А.К. од Турција, која во моментот престојува во Штип, поради тоа што физички нападнала полициска службеничка која била работно ангажирана за физичко обезбедување за време на судскиот процес кој се одвивал во Апелациониот суд – Штип. По целосно документирање на случајот ќе следува соодветен поднесок“, информираат од МВР.
Инаку, 52-годишната турска државјанка уште пред почетокот на рочиштето пред зградата на Основниот суд започнала вербална расправија со еден од полицајците. Вчерашното судење на петмината турски државјани, обвинети за убиството на 25-годишниот поранешен студент од Турција, помина под силно полициско обезбедување, а присуствуваа и семејствата на обвинетите.
Судењето продолжува на 19 декември.