Уставниот суд на Република Северна Македонија соопшти дека остро ги осудува обидите за груба партизација и политизација на неговата работа од страна на одредени политички партии.
Во соопштението се наведува дека некои партии настојуваат да ја зголемат сопствената политичка видливост преку злоупотреба на одлуките и меѓународните активности на Судот.
„Меѓународната соработка на Судот е ставена во дневнополитички контекст и искористена за партиски пресметки, иако таа претставува една од неговите стратешки определби“, се вели во соопштението.
Судот потсетува дека годинава потпишал меморандуми за соработка со уставните судови на Косово, Египет и Србија, како и дека годинава претседава со Балканскиот форум на уставни судови.
„Уставниот суд останува доследен на својата уставна надлежност и независност. Судот нема да подлегне на какви било политички притисоци, влијанија или обиди за дискредитација и ќе продолжи да ја зајакнува својата меѓународна соработка“, се нагласува во соопштението.
Од Судот апелираат до политичките фактори да покажат поголема уставна и политичка култура и да не ги водат политичките конфронтации на грбот на институциите и владеењето на правото.
Тие, исто така, оценуваат дека се „недозволени и апсурдни“ квалификациите од одредени политички субјекти дека одлуките на Уставниот суд се „неуставни“ или „незаконски“, потсетувајќи дека согласно член 112 од Уставот, одлуките на Судот се конечни, извршни и општозадолжителни.
„Наместо да повикуваат на протести насочени директно против владеењето на правото, партиите е потребно да покажат вистинска посветеност кон европските вредности и потребите на граѓаните“, порачуваат од Уставниот суд.
На крајот, Судот ги повика сите политички чинители да покажат одговорност и воздржаност во јавната комуникација и да се воздржат од ширење невистини и манипулации на сметка на институцијата која е чувар на Уставот и на уставно-правниот поредок на државата.