Агенцијата за разузнавање и Агенцијата за национална безбедност ги користеле државните ресурси за да ме преслушкуваат мене, како и бизнисмени и новинари и време е оние што вршеле злоупотреби да завршат зад решетки, порача денеска премиерот Христијан Мицкоски.
– Јас не би можел да зборувам за деталите, бидејќи тоа е државна тајна и така се класифицирани тие документи. Но едно е факт, дека двете агенции и Агенцијата за разузнавање и АНБ темелно се занимавале со претседателот на најголемата опозициска партија во тоа време, т.е. со мене, меѓу другото и со бизнисмени и со новинари. Така што, еве да оставиме време периодов процесот да тече, да видиме Обвинителството што ќе каже, судиите нормално во еден судски процес. Јас сум навикнат, еве истекува осмата година како сум претседател на ВМРО-ДПМНЕ навикнат сум на таков тип на луѓе и не ме изненадува тоа бидејќи и тогаш стигаа до нас информации што сè се случува – рече Мицкоски.
Премиерот додаде дека станува збор за луѓе полусвет, кои немаат во животот доволно мотив да се занимаваат со убави работи, па се занимаваат со туѓите животи, мислејќи дека на тој начин ќе добијат некаква пофалба, некаква предност кај нивните наредбодавци, и ќе напредуваат така во кариерата.
– Секоја работа има свој почеток и свој крај, очекувам овие глодари да завршат онаму каде им е местото, зад решетки и еднаш засекогаш да се стави крај на злоупотребата на ваквиот тип на агенции и ресурсите со кои тие располагаат – рече премиерот Христијан Мицкоски.
На новинарско прашање дали АНБ ги доставило документите до Јавното обвинителство, затоа што од ЈО тврдат дека не иницирале никаква постапката, директорот на АНБ, Бојан Христовски рече дека ЈО е известено.
– Таканаречената реформирана АНБ во 2019 година била сè, само не била реформирана институција, повеќе била фасада од реформирана институција. Тоа што се случувало внатре, било да една помала група, составена од еден поранешен директор и помала група вработени во институцијата, за која и тоа како имаме индиции, ја злоупотребила својата службена положба. За истото е известено надлежното јавно обвинителство. Повеќе не би можел да споделам, се работи за детали кои се со висока класификација и се сензитивни и не би сакале, меѓу другото, да ја нарушиме некој законски процес или процес којшто е или би бил започнат од Јавното обвинителство – рече Христовски.
Овој ден, додаде тој, јас повеќе го гледам како ден во кој раскрстуваме со минато.
– Ден во кој покажуваме и даваме порака до сите кои некогаш се дрзнале да ја злоупотребат својата службена положба повеќе да не го прават тоа. Се надеваме доколку се докаже вина кај оние за кои ние го имаме известено ЈО ќе одговараат за тоа и дека никогаш нема да се повтори незакоснско, непрофесионално и неетичко работење во агенцијата – рече Христовски.