Во првите денови од изборната кампања, Европскиот универзитет во Тирана му ја додели на Али Ахмети титулата „Почесен доктор на науки“.
Во официјалното соопштение на Универзитетот се наведува дека мотивацијата за ова одликување е поврзана со придонесот на Ахмети за Албанците. „Оваа награда е тесно поврзана со нашето заедничко патување за обезбедување на правата на Албанците, градење мир и напредок кон евроатлантската интеграција на С. Македонија.“ – рече Али Ахмети, претседател на ДУИ. Ова го објави ТВ Алсат.
Натаму телевизијата наведува: Координаторот на пратеничката група на Вреди Беким Ќоку реагираше на наградата. Тој нагласува дека веќе стана закон секогаш кога наближуваат избори на Ахмети да му се даде некоја почесна награда. „Но, за што се чествува Ахмети? Токму во време кога се соочува со сериозни обвинувања за соработка со режимот на српскиот претседател Вучиќ преку продажба на банкарските акции на неговото семејство на луѓе, блиски до Вучиќ; за сериозни прекршувања во партијата, каде што половина од раководството САД ги прогласиле како „непожелни личности“ („персони нон грата“), вклучувајќи ја и десната рака на Ахмети Артан Груби, кој моментно е во бегство со меѓународна потерница, но кој за Ахмети е едноставно „некаде во албанскиот простор“. Тој никогаш не се дистанцирал од Груби, ниту од ниту еден од неговите партиски колеги- „непожелни личности.“ – нагласува Беким Ќоку во својата реакција.
Ова не е првото одликување, или полесно признание, што Ахмети го добива на прагот на една изборна кампања, или во текот на изборна кампања. На изборите во мај 2024 година Ахмети го критикуваше Албин Курти дека се меша во изборите во Македонија, а потоа беше поканет во Тирана да биде прогласен како „Почесен граѓанин“ среде изборната кампања. Тогашниот градоначалник на Тирана Ерион Велиај лично ја предаде наградата, а говор одржа и премиерот Еди Рама. Неколку седмици пред овој настан Ахмети беше прогласен и како „почесен граѓанин“ на општина Призрен. Во декември 2016 година, на првиот ден од парламентарната изборна кампања, во центарот на Скопјe Ахмети беше одликуван од тогашниот претседател на Косово Хашим Тачи, под оправдување дека ова е поврзано со 108-годишнината од воспоставувањето на албанската азбука.