Македонското образование „изгубило“ 5.431 ученик, во последните пет години поради што под клуч биле ставени 30 училишта во државата, објави Мета.мк
Трендот на контиинуирано намалување на бројот на ученици-основци е евидентен, според бројките кои ги објавува Државниот завод за статистика (ДЗС), но државата засега нема стратегија за решавање на овој долгогодишен проблем.
м-р Дончо Герасимовски, демограф, аналитичар и поранешен директор на ДЗС, кој самостојно и редовно ги следи трендовите кои се однесуваат на наталитетот и образованието во државата, за овој негативен тренд гледа две причини:.
„Прво, причина за ова е намалениот наталитет. Се раѓаат малку деца. Во 7 од 8 региони во земјава имаме негатвен природен прираст. Во повеќе од 60 отсто од општините има намален наталитет, а тоа силно влијае на бројот на учениците, посебно на оние кои се запишуваат во прво одделение.
Друг важен фактор за се помалиот број основци во училиштата, е иселувањето на младото население.
„Од државата се иселува претежно младото население. Расте бројот на население на живородени деца надвор од земјата. Годишно, во просек, по 1.000 деца се раѓаат во странство. Има 10 општини во Македонија каде има повеќе живородени деца во странство одошто во Македонија, такви се Пласница, Маврово-Ростуше, струмичко Ново Село“, потенцира Герасимовски.