СДСМ остро го нападна новинарот и уредник Бранко Героски, обвинувајќи го дека работи на промоција на платформата на ВМРО-ДПМНЕ и дека е дел од „мрежа на стари УДБА-новинари“.
Во соопштение до јавноста, СДСМ реагира на колумните на Героски во кои тој зборува за можни промени во опозицискиот блок и за новоформираната иницијатива. Партијата го обвинува дека „бара ново дете за СДСМ“ и дека заедно со „истите оние кои ги бранеше и порано, отворено ја промовира платформата за иднината на Мицкоски“.
СДСМ отиде подалеку, инсинуирајќи дека Героски е дел од „мрежа на служби“, спомнувајќи дека во минатото го угостил во својот стан началникот на БИА, Живаљевиќ, кого го поврзуваат со настаните од 27 април. Партијата го става Героски во групата „стари УДБА-новинари“ заедно со Латас и Ивона, обвинувајќи ги дека го блокираат отворањето на досиејата на тајните служби.
На крајот од соопштението, СДСМ упатува остра порака дека „за нив во слободна, демократска и европска Македонија, навистина нема иднина“.
Реакција на Бранко Героски
Героски во својата реакција изјави дека ова не му е првпат да биде цел на напади од СДСМ и Венко Филипче, со исти навреди и клевети како и пред шест месеци.
„Глупавото соопштение на Бихаќка, кое очигледно го пишал истиот Србин што им ги пишува и другите, не вреди многу да се коментира“, рече Героски и додаде дека раководството на СДСМ ја води партијата кон целосно распаѓање.
Тој оцени дека партијата е вознемирена од критичките гласови, вклучително и од Иницијативата 12.05. и колумните на Петар Арсовски, и дека „знаат дека деновите на Бихаќка им се избројани“.
Героски најави дека повторно ги „чека“ Филипче и авторот на соопштението на својот новинарски „нишан“.