Починал на возраст од 60 до 70 години и во последните години од животот страдал од повеќе заболувања што му ја попречувале подвижноста.
Ова се прелиминарните наоди од антрополошките анализи на посмртните останки на цар Самоил, објавени вчера од бугарските научници.
Најмалку 3 години ќе требаат да се утврди дали коските на Самоил се на Самоил
Постојат траги од траума на подлактицата што довела до тешко оштетување на левата рака. Самоил бил со низок раст за своето време.
Археологот проф. д-р Људмил Вагалински за Радио Софија изјави дека првичниот преглед на останките бил извршен уште во 2012 година, додека втората фаза се одвила неодамна. Бугарските научници поминале неколку дена во Грција пред официјалната церемонија на предавање.
„Додека бевме во Солун, ги изненадивме нашите грчки колеги инсистирајќи на конкретен тест за утврдување на полот на поединецот – надминувајќи го само мерењето на висината. Скелетот е релативно грацилен; иако покажува изразени машки карактеристики, има и одлики што се потипични за женски пол. Грците беа многу изненадени. Ние силно инсистиравме на тоа, па тестот подоцна беше спроведен на Универзитетот во Бон со користење на примерок од Самоил. Стопроцентно е сигурно дека поединецот бил маж“, рече Вагалински.
За време на посетата на Солун, тимот ги испита и скелетните останки од четирите гробни места лоцирани во базиликата на островот Свети Ахил во Малото Преспанско Езеро.
Предвидено е да се развие сеопфатна истражувачка програма во која ќе бидат вклучени бугарски и странски специјалисти. Работата ќе опфати радиојаглеродно датирање, анализа на древна ДНК, анализа на стабилни изотопи и нова реконструкција на главата на цар Самоил.
Истражувачите ќе се обидат да го утврдат полот на децата погребани во саркофазите, како и евентуалните роднински врски меѓу поединците. Конечните резултати од истражувањето се очекуваат за околу три години.