Претседателот на Србија, Александар Вучиќ, во интервју за РТС изјави дека земјата се соочува со „сериозна хибридна војна“, истакнувајќи дека имало над 25.000 непријавени собири. Тој нагласи дека направил сè за да го зачува мирот и стабилноста во државата. Во врска со апсењето на В.А., кој е осомничен за напад врз шаторска населба на поддржувачи на владата во близина на Собранието, Вучиќ рече дека наскоро ќе се разјасни дали станува збор за „терорист или убиец во обид“. Тој побара објавување на видеото од апсењето за да се избегнат погрешни толкувања дека станува збор за конфликт меѓу демонстрантите.
„Верувам дека постојат шанси Србија да влезе во ЕУ пред 2030 година. Но, постои друго прашање – како да се реши прашањето за Косово и Метохија. И јас не можам и нема да ја прифатам независноста на Косово и Метохија, ако некој друг го сака тоа по мене, нека го реши“, изјави Вучиќ, осврнувајќи се на европската интеграција на Србија. Тој додаде дека геополитичката ситуација се менува и очекува „изненадувања“ во наредните година и пол.
Вучиќ истакна дека ЕУ останува клучен партнер, како најголем инвеститор и „најдобро место за живеење“, иако забележа пад во економскиот раст на Унијата. Во однос на санкциите на САД врз Српската нафтена индустрија (НИС), тој увери дека нема да има недостиг од нафтени производи, додавајќи: „Првиот ден кога ќе имаме проблеми, ќе ги земеме работите во свои раце и ќе ја заштитиме Србија.“ Тој потврди дека разговарал со унгарскиот премиер Виктор Орбан за зголемен увоз на нафтени деривати преку компанијата МОЛ и побарал од Русите да најдат купувач за НИС доколку нема друго решение.