Буквално сè што можеше да тргне на лошо за ракометарите на Вардар во Франција – тргна, па десеткуваниот двократен европски првак се враќа со огромна негатива по првиот натпревар од четвртфиналето во Европската лига на ЕХФ, откако во Монпелје загуби со 33:23.
Уште пред мечот „црвено-црните“ претрпеа тежок удар со отсуството на своите најдобри бекови и ракометари воопшто – Јака Малус поради повреда и Дмитро Горига поради болест, а по 8:10 во првото полувреме во второто останаа и без исклученото лево крило Жуниор Тузолана, а од 40. минута и без бекот Жоао Педро поради добиен удар со колено во градите!
Имајќи предвид дека Малус и Горига заедно постигнаа 115 гола во ова натпреварување сезонава, а на оваа средба Педро до повредата даде 6, од кои 5 во првиот дел, плус Тузолана 2, Иван Чупиќ не ни можеше да се надева на многу повеќе во првото соочување во рамките на последниот филтер пред фајналфорот.
Токму Педро и Урош Митровиќ беа најефикасни кај гостите, со тоа што Португалецот имаше реализација 6/8, а Србинот 6/14, плус две загубени топки.
Со двоцифрено заостанување од првиот меѓусебен дуел со противникот со кој досега имаа 7:3 во победи, на вардарци ќе им треба чудо во реваншот на 5 мај во Скопје.