Машката ракометна репрезентација на Македонија го отвори „Жолтиот куп“ во Винтертур со победа над Бахреин од 32:28, откако на полувреме водеше со 15:13.
Освен во средината на вториот дел, кога петкратниот азиски вицешампион и 29. селекција од последното Светско првенство поведе со 20:19, пред и потоа избраниците на селекторот Кирил Лазаров имаа контрола врз играта и резултатот, а највисоката предност во финишот достигна 32:25.
Капитенот Филип Кузмановски со 9 гола беше најефикасен во македонскиот тим, за кој по пет пати во листата на стрелците се запишаа десниот бек Мартин Велковски, левото крило Иван Џонов и десното крило Ненад Костески во вториот триумф во меѓусебните дуели по тој од 28:23 на СП 2019.
Утре од 17:45 часот „црвено-жолтите“ за противник ќе ја имаат Украина, декласирана со 38:27 од домаќинот Швајцарија.
За Македонија овој турнир е во функција на претстојното Европско првенство, кадешто на 16 јануари ќе му излезе на мегдан на соорганизаторот, светски и олимписки првак Данска.