Фудбалерите на Престон лајонс, најпопуларниот клуб на македонската заедница во Австралија, ремизираа 1:1 кај лидерот Авондејл и се доближија до четвртфиналето на Австралискиот шампионат.
Со 7 бода, „лавовите“ се втори во групата Ц, а за да останат таму и да разигруваат за титулата во првото издание на единствената втора лига на Австралија ќе мора да го почекаат резултатот од последниот дуел меѓу Канбера Кроејша (4 бода) и НВС Спирит (5) закажан за ноќва во 3 часот по средноевропско време.
Авондејл, кој ја освои групата со 12 бода и ѝ го нанесе единствениот пораз на некогашна Престон Македонија, поведе во 50. минута, а израмни Џонас Марковски со глава 15 минути подоцна.
Напаѓачот Џонас е син на некогашниот австралиски репрезентативец Џон Марковски со 19 настапи и еден гол за „сокероси“.