Тренерот на Лудогорец, Руи Мота, најави игра за победа на неговиот тим против Шкендија утревечер од 20 часот на Националната арена „Тодор Проески“ во Скопје во првиот натпревар од баражот за групната фаза во Европската лига на УЕФА.
„Мечевите во Европа секогаш се тешки, но Лудогорец има високи цели и сакаме да победиме утре. Нема да играме за нерешено, туку ќе бараме победа и добар резултат пред реваншот“, изјави Португалецот на клупата на бугарскиот шампион.
Лудогорец, кој пред три дена ремизираше без голови како домаќин против Локомотив Софија во Првата лига на Бугарија, во претходното квалификациско коло за Лигата на Европа беше елиминиран од унгарски Ференцварош по 0:0 во Разград и 0:3 во Будимпешта.