Цените на нафтата и гасот нагло растат како што се интензивира конфликтот на Блискиот Исток, а нападите врз енергетската инфраструктура и прекините во снабдувањето сè повеќе ги погодуваат глобалните пазари.
Цените на суровата нафта Брент утрово надминаа 115 долари за барел, што е највисоко ниво за повеќе од една недела, додека цените на бензинот се зголемија за околу 30 проценти. Зголемувањето доаѓа откако клучните објекти во регионот беа погодени од напади, а сообраќајот низ Ормутскиот теснец беше сериозно нарушен.
Џејмс Мидвеј, заменик-директор на британскиот тинк-тенк Вердант, за Ал Џезира изјави дека ова не е краткорочен скок на цените.
Според него, пред неколку недели постоеше надеж дека централните банки како што се Банката на Англија, Федералните резерви на САД и Европската централна банка ќе можат да го игнорираат зголемувањето на цените, сметајќи на брзо завршување на конфликтот и стабилизирање на пазарите.
Сепак, ситуацијата значително се промени во меѓувреме. Покрај тешкотиите во сообраќајот низ Ормутскиот теснец, сега има сериозни прекини и големи шокови во самото производство на нафта и гас, особено гасот, што дополнително ја намалува глобалната понуда.
Затоа, заклучува Мидвеј, сегашното зголемување на цените изгледа како долгорочен и значаен тренд, а не како привремена реакција на пазарот на краткорочна криза.