Претседателката на српскиот парламент, Ана Брнабиќ, во понеделник пристигна во Киев во официјална посета, каде што се сретна со украинскиот претседател Володимир Зеленски и претседателот на Врховната рада, Руслан Стефанчук.
Ова е прва посета на висок српски претставник на Украина од почетокот на руската инвазија.
За време на разговорите, Брнабиќ нагласи дека Србија го поддржува територијалниот интегритет на Украина и нејзиниот европски пат. Според неа, Белград е подготвен да обезбеди техничка и експертска помош во процесот на европска интеграција. „Србија и Украина можат да ја градат својата соработка. Јасно наведуваме дека местото на Украина е во Европа“, рече Брнабиќ, цитирана од новинската агенција ТАНЈУГ.
Украинската страна ја оцени посетата како гест на солидарност и ја потврди желбата за продлабочување на меѓупарламентарниот дијалог. Претседателот Володимир Зеленски коментираше за состанокот на социјалната мрежа X (порано Твитер):
„Имав средба со претседателката на Парламентот на Србија, Ана Брнабиќ. Главен фокус на разговорот беше процесот на европска интеграција – стратешка цел за двете наши земји. Разговаравме и за меѓувладината соработка и партнерството за регионална безбедност.
Благодарен сум на Србија за нејзината поддршка за територијалниот интегритет на Украина“, објави Зеленски.
Српската делегација го посети и Музејот на руската агресија во Киев, каде што Брнабиќ им оддаде почит на жртвите од војната.
I had a meeting with Speaker of the Parliament of Serbia Ana Brnabić. The main focus of our conversation was the process of European integration. This is a strategic goal for both of our countries. We also discussed intergovernmental cooperation and partnership for regional… pic.twitter.com/yNesZY5yHy
— Volodymyr Zelenskyy / Володимир Зеленський (@ZelenskyyUa) November 10, 2025