Застрашувачки снимки на кои се гледаат членови на Хамас како убиваат Палестинци станаа вирални на социјалните мрежи. Ова веднаш предизвика стравувања дека мировниот договор на американскиот претседател Доналд Трамп за Газа може да пропадне. Егзекуциите се чини дека се дел од напорите на милитантната група Хамас да ја задржи власта во енклата.
Во видеото, група мажи клекнуваат на земја со раце врзани зад грбот. Зад нив стојат вооружени членови на Хамас со покриени лица. Откако се слушаат истрелите, мажите паѓаат на земја, а присутните скандираат „Алаху акбар“ (Бог е голем). Егзекутираните ги нарекуваат „колаборационисти“, додека ужасните сцени ги снимаат со своите мобилни телефони, пишува i24News.
Извор од Хамас ја потврди автентичноста на видеото, кое предизвика широка загриженост во Газа и пошироко, кратко откако стапи на сила мировниот договор постигнат со посредство на Трамп, кој требаше да стави крај на двегодишното насилство.
Снимката беше придружена со извештаи дека Хамас повикал околу 7.000 припадници на своите безбедносни сили за да ја вратат контролата врз областите во Газа од кои се повлече израелската војска.
„Прогласуваме општа мобилизација во име на националната и религиозната должност – да ја исчистиме Газа од отпадници и соработници на Израел. Сите мора да се пријават во рок од 24 часа на одредени локации користејќи официјални кодови“, се вели во повикот.
Минатиот месец, претставници блиски до Хамас признаа дека погубиле тројца мажи обвинети за соработка со Израел. Новото видео предизвикува загриженост дека Хамас се обидува да ја консолидира власта преку заплашување и насилство.
Жителите на Газа наведуваат дека членови на Хамас се појавиле на улиците денеска и се распоредиле по патиштата низ кои поминува хуманитарната помош, а палестински безбедносни извори наведуваат дека десетици луѓе се убиени во последните денови во судири меѓу Хамас и соперничките фракции.
Извори на Хамас за Ројтерс изјавија дека групата нема да толерира кршење на законот во Газа и дека ќе ги таргетира „соработниците, вооружените разбојници и дилерите на дрога“, пренесува Ројтерс. Така, цивилите повторно се најдоа во средина на оружениот судир.
Еден преплашен жител на Газа рече: „Овој пат, луѓето не бегаа од израелските напади. Тие бегаа од сопствениот народ“. Претставници на Хамас изјавија дека нивните безбедносни сили се обидуваат да воспостават ред и предупредија дека „секоја вооружена активност надвор од рамките на отпорот нема да биде толерирана“.
Иако Израел ја поздравува веста за ослободувањето на сите 20 преживеани заложници од Газа, расте фрустрацијата поради враќањето само на неколку тела. Се очекуваше дека Хамас можеби нема да може веднаш да ги врати сите 28 мртви. Но, израелските владини претставници се „шокирани и фрустрирани“ откако беа испратени само четири ковчези, објави новинскиот портал Ynet.
Израел очекува „напредок“ по ова прашање најдоцна до вторник вечерта, објави „Тајмс оф Израел“, иако не е објавена официјална потврда за овој рок. Хамас, исто така, официјално не коментираше за статусот на предавањето. Извори блиски до Хамас изјавија дека е потребна дополнителна опрема и време за извлекување на телата од оштетениот Појас Газа.
Израелските власти не веруваат во тврдењата на Хамас дека не можат да ги лоцираат или вратат телата. Неколку израелски медиуми објавија дека Израел се сомнева дека групата ги држи телата како еден вид поттик за понатамошни преговори.
Министерот за одбрана на Израел, Израел Кац, во понеделникот го обвини Хамас за кршење на договорот за прекин на огнот и предупреди на сериозни последици. Тој истакна дека Израел го исполнил својот дел од договорот со ослободување на речиси 2.000 притворени Палестинци во понеделникот.
Во овој период, ожалостените членови на семејствата на починатите заложници жестоко ја критикуваат израелската влада. Јаел Адар, мајката на Тамир Адар, го нарече начинот на кој владата ги води преговорите со Хамас „предавство“, велејќи дека официјалните лица не успеале да постават апсолутен рок за враќање на сите тела. Форумот за семејства на заложници и исчезнати повика на „итна суспензија“ на договорот со Хамас сè додека секој починат заложник не биде вратен од Газа. Откако ќе бидат вратени телата, тие мора да бидат и формално идентификувани.
Во претходен случај, Хамас врати тело кое не му припаѓаше на ниту еден од заложниците, што предизвика загриженост во врска со верификацијата. Во меѓувреме, израелската војска соопшти дека отворила оган во вторникот за да елиминира можна закана од сомнителни лица кои им се приближиле на нејзините сили во северниот дел на Појасот Газа, а здравствените власти во енклата соопштија дека најмалку шест Палестинци биле убиени од израелски оган.
Враќањето на телата на мртвите заложници во Појасот Газа може да трае со денови или недели, соопшти во вторникот Меѓународниот комитет на Црвениот крст (МКЦК). Со оглед на уништувањето на зградите и инфраструктурата во крајбрежната енклава, понекогаш е тешко да се лоцираат останките, изјави портпаролот на МКЦК, Кристијан Кардон, во вторникот во Женева.
„Постојат јасни индикации дека ова може да потрае значително подолго поради тешкотиите во потрагата по останките во Газа што можеби се под урнатините“, објасни Кардон. Не може да се исклучи можноста некои тела никогаш да не бидат пронајдени, истакнува агенцијата ДПА.
МКЦК во сите дискусии нагласи колку е важно враќањето на останките за семејствата на жртвите и за евентуално помирување по завршувањето на војната. Црвениот крст не знае однапред кога или каде телата во Појасот Газа ќе му бидат предадени.
ОН и Меѓународниот комитет на Црвениот крст во вторникот повикаа на отворање на сите премини во Појасот Газа за да се овозможи проток на повеќе хуманитарна помош, по стапувањето во сила на прекинот на огнот.
„Според информациите што ми се достапни, не сите премини во Газа се отворени за хуманитарна помош. Тоа е главниот проблем во моментов и тоа е она што хуманитарните работници, вклучително и Црвениот крст, го бараат во последните часови“, рече Кардон на прес-конференција во Женева. Отворањето мора да се случи „итно“, уверува тој.
Јенс Лерке, портпарол на Канцеларијата на ОН за координација на хуманитарните работи (OCHA), повика на зголемување на испораките на помош во Газа, но нагласи дека тоа не зависи од хуманитарните работници. „Имаме 190.000 тони помош во регионот подготвени да бидат испратени“, особено во Јордан и Египет, рече Лерке.