Министерството за надворешни работи на Јужна Кореја изрази „загриженост и жалење“ поради притворањето на стотици работници, претежно Јужнокорејци, во фабриката на Хјундаи во Џорџија, САД, за време на рација против нелегална имиграција. Американскиот претседател подоцна ги нарече приведените „нелегални странци“.
„Економските активности на нашите компании што инвестираат во САД и правата и интересите на нашите граѓани не треба да бидат неправедно прекршени“, изјави портпаролот на министерството на брифинг, додавајќи дека загриженоста била изразена преку Амбасадата на САД во Сеул.
Во четврток, американските имиграциски власти извршиле рација во фабриката за електрични возила на Хјундаи во Џорџија, при што биле приведени 475 лица. Според властите, операцијата била спроведена поради „нелегални практики на вработување и сериозни кривични дела против федералните закони“.