Лана Понтинг, која како тинејџерка поминала еден месец на лекување во Институтот „Алан Меморијал“ во Монтреал, Канада, тврди дека била жртва на тајни експерименти на американската Централна разузнавачка агенција (ЦИА) и поради тоа покрена тужба.
Понтинг раскажува дека во април 1958 година, на 16-годишна возраст, по судска наредба за „непослушно“ однесување, била сместена во поранешната психијатриска установа, каде што, без нејзино знаење, станала дел од илјадниците лица вклучени во строго доверливата програма на ЦИА за контрола на умот, пренесува Би-Би-Си.
Таа е еден од двајцата именувани тужители во колективната тужба поднесена од канадски жртви на овие експерименти и нагласува дека по приемот во болницата, несвесно учествувала во озлогласената операција МК-Ултра на ЦИА.