Во интервју за руски медиуми, шефот на руската дипломатија, Сергеј Лавров, изјави дека Москва ќе спроведе нуклеарни тестови доколку и другите нуклеарни сили започнат со вакви проби, нагласувајќи дека Русија не планира да ги иницира тие. Тој додаде дека руската страна е отворена за дијалог со Вашингтон околу загриженоста за „сомнителните подземни активности“ што ги споменуваат Американците.
Лавров изрази загриженост од американските изјави кои укажуваат на можноста нуклеарните тестови да се користат за геополитички цели, предупредувајќи дека САД ризикуваат да се оддалечат од принципот на недозволивост на нуклеарна војна. Русија претходно предложи едногодишно продолжување на ограничувањата од Договорот за стратешко офанзивно оружје (НОВО), при што, според Москва, одлуката може да се донесе во секое време до 5 февруари 2026 година, кога истекува договорот. За продолжувањето не се потребни дополнителни консултации, туку само согласност од Вашингтон.
Лавров се осврна и на комуникациите меѓу Москва и Вашингтон, потсетувајќи на договорот меѓу рускиот претседател Владимир Путин и американскиот претседател Доналд Трамп за состанок во Будимпешта. „Руската страна е подготвена да разговара со САД за продолжување на подготовките за состанокот меѓу Путин и Трамп, доколку и кога нашите американски партнери ќе го презентираат својот предлог“, истакна тој, потврдувајќи го посветеноста на дијалогот.