Рускиот министер за надворешни работи, Сергеј Лавров, во понеделник изјави дека западните земји прават сè за да ги спречат преговорите за мир во Украина.
„Тие само бараат изговор да спречат преговори“, изјави Лавров во интервју за руската државна телевизија Росија, чии делови беа објавени на Телеграм.
Тој, исто така, го критикуваше ставот на украинскиот претседател Володимир Зеленски, опишувајќи го како „непопустлив“ и истакнувајќи дека Зеленски „упорно поставува услови и инсистира на итен состанок“ со рускиот лидер Владимир Путин.
На прашањето за заканите од Западот за нови санкции против Русија доколку не дојде до преговори, Лавров ги нарече овие потези „обид да се наруши процесот што го започнаа претседателите Путин и Доналд Трамп, кој донесе значителен напредок“.
Медијаторските напори на американскиот претседател Доналд Трамп, кој наводно бара брз крај на конфликтот во Украина, кулминираа со самит со неговиот руски колега Владимир Путин на 15 август во Алјаска, по што три дена подоцна следеше прием во Белата куќа за Володимир Зеленски и европските сојузници на Украина.
Сепак, двете страни остануваат далеку од компромис.
Русија ја нападна Украина во февруари 2022 година и моментално контролира околу една петтина од територијата на земјата, вклучувајќи го и Крим, кој беше анектиран во 2014 година.
Додека Москва и Киев меѓусебно се обвинуваат за кочење на потенцијалните разговори меѓу нивните лидери, Трамп во петокот соопшти дека ќе одлучи за следните чекори во рок од две недели.