Унгарскиот премиер Виктор Орбан објави „отворено писмо“ до украинскиот претседател Володимир Зеленски на „X“, обвинувајќи го дека четири години се обидува да ја вовлече Унгарија во војна меѓу Украина и Русија.
„Четири години не можевте да го прифатите ставот на суверената унгарска влада и унгарскиот народ за руско-украинската војна. Четири години работевте на тоа да ја принудите Унгарија да учествува во војната меѓу вашата земја и Русија“, напиша Орбан.
Во писмото, тој тврди дека Зеленски, Брисел и унгарската опозиција „ги координираат напорите“ за да донесат „проукраинска влада“ на власт во Унгарија.
Орбан го обвини Зеленски за „блокирање на нафтоводот Пријателство“, или нафтоводот Дружба, кој, според него, е клучен за снабдувањето со енергија на Унгарија.
„Вашите постапки се против интересите на Унгарија и го загрозуваат безбедното и достапно снабдување со енергија за унгарските семејства. Затоа, ве повикувам да ја промените вашата антиунгарска политика“, рече Орбан.
Тој додаде дека Унгарците „не се одговорни за ситуацијата во која се наоѓа Украина“, дека сочувствуваат со украинскиот народ, но дека „не сакаат да учествуваат во војната“, „не сакаат да ги финансираат воените напори“ или „да плаќаат повеќе за енергија“.
„Ве повикувам веднаш да го отворите гасоводот „Пријателство“ и да се воздржите од понатамошни напади врз енергетската безбедност на Унгарија. Повеќе почит кон Унгарија!“, заклучи Орбан во писмото.
Писмото на Орбан доаѓа пред парламентарните избори во Унгарија закажани за април, каде што тој се соочува со својот најсилен предизвик во последните 15 години – опозицискиот блок предводен од Петер Маѓар кој убедливо води пред владејачката партија Фидес на Виктор Орбан.
Орбан сè повеќе ја гради својата кампања врз спротивставување на Брисел и Украина, претставувајќи се како заштитник на енергетските и националните интереси на Унгарија и противник на понатамошната воена и финансиска поддршка за Киев.
Унгарија распоредува војска за одбрана на енергетската инфраструктура од Украина!