Рускиот претседател Владимир Путин разговараше со кинескиот лидер Си Џинпинг за последните контакти меѓу Русија и САД, изјави денеска Јуриј Ушаков, помошник на рускиот претседател, на маргините на самитот на Шангајската организација за соработка, што се одржува во кинескиот град Тјенџин.
Да, нашиот претседател, пред сè, многу детално комуницираше, секако, со претседателот на Народна Република Кина. Седеа заедно и можеа активно и многу ефикасно да разговараат. Вклучувајќи, како што ми кажа нашиот претседател, и за најновите контакти со Американците, рече Ушаков.
Претходно денеска, во своето обраќање до учесниците на самитот, Си Џинпинг изрази уверување дека заедничките напори на сите земји-членки ќе го направат самитот успешен и ќе ја зајакнат улогата на Шангајската организација за соработка, придонесувајќи за нејзин понатамошен развој.
Кинескиот лидер, исто така, оствари средба со премиерот на Ерменија, Никол Пашињан, при што двајцата најавија воспоставување на стратешко партнерство. Беа потпишани заедничка изјава за формирање на ова партнерство, како и неколку договори за соработка во области како пазарен надзор, медиуми и други сектори.
Си Џинпинг нагласи дека пријателството меѓу Кина и Ерменија има длабоки корени и дека во изминатите 33 години од воспоставувањето на дипломатските односи, билатералните врски постојано се развиваат. Тој истакна дека новото стратешко партнерство претставува клучен момент за односите меѓу двете земји и дека тие ќе продолжат да ја продлабочуваат соработката во различни области, според соопштението на кинеското Министерство за надворешни работи.