Трамп и Зеленски имаат различни гледишта за напредокот на руските сили. На мапата што Трамп му ја покажал на Зеленски во Белата куќа биле означени следните проценти на руска контрола: Луганск 99%, Донецк 76% (двете области го сочинуваат регионот Донбас), 73% од регионите Херсон и Запорожје на југ и југоисток, 4% од регионот Харков на североисток и 0,5% во регионите Сумски и Николаев.
„Ви благодарам за мапата, беше одлична“, иронично прокоментирал украинскиот претседател Володимир Зеленски за време на состанокот во Белата куќа, каде пред присутните била презентирана мапа на Украина со една петтина од територијата обележана во црвено.
„Размислувам како да ја вратам“, додал тој.
Присутните, вклучително и европските лидери, кратко се насмеале, на што Трамп духовито одговорил: „Не се секирај, ќе ти дадеме една“.
Снимката од состанокот во Вашингтон, која се рашири на социјалните мрежи, ги разгоре шпекулациите дали Украина ќе мора да ги отстапи регионите Донецк, Луганск, Херсон и Запорожје на Русија во рамките на преговорите.
Зеленски изразил резерви кон процентите прикажани на американската мапа, кои укажуваат на обемот на територијата под руска контрола. Според него, тие не ја одразуваат целосно реалноста.
Тимот на Зеленски, пак, презентирал своја мапа, на која било прикажано дека во последните 1.000 дена Русија окупирала помалку од 1% од украинската територија. Зеленски подоцна изјавил дека за време на разговорот со Трамп се спротивставил на податоците од американската мапа, нагласувајќи дека станува збор за „реална контрола, а не за гласини“.
Трамп, од друга страна, имал поинакво мислење. Ден по состанокот, во изјава за Фокс Њуз, тој рекол: „Сигурно сите ја видовте мапата. Русија зазеде голем дел од територијата, и таа е под нивна контрола“. Тој додал дека руските сили се „многу посилни и не запираат“.
На прашањето за расположението меѓу европските лидери во врска со можната размена на територии, Трамп изјавил: „Сега зборуваат за Донбас, но Донбас во моментов е 79% под контрола на Русија“.
Според аналитичарите од украинската група за мапирање DeepStateUA, од ноември 2022 година Русија окупирала 5.842 квадратни километри од Украина.
Состанокот во Вашингтон меѓу Трамп, Зеленски и европските лидери бил прекинат по 40 минути, за Трамп да оствари телефонски разговор со Путин и да разговара за можна тројна средба. Додека светот очекува разврска, неколку земји, вклучително Австрија, Унгарија, Швајцарија и Србија од регионот, се понудиле да бидат домаќини на таков самит.
Зеленски изјавил дека во наредните 10 дена очекува појаснување за какви безбедносни гаранции ќе ѝ се понудат на Украина и дека тие ќе бидат тема на дискусија на потенцијалниот самит.
https://x.com/HotSpotHotSpot/status/1957525561141784917