Високиот комесар на Обединетите нации за човекови права, Фолкер Турк, изјави дека „војната во Газа мора веднаш да заврши“ и предупреди дека понатамошната ескалација „ќе доведе до уште помасовно присилно раселување, повеќе убиства, неподносливо страдање, бесмислено уништување и злосторства против човештвото“.
Австралиската министерка за надворешни работи Пени Вонг го повика Израел „да не оди по тој пат“, нагласувајќи дека тоа „само дополнително ќе ја влоши хуманитарната катастрофа во Газа“.
Британскиот премиер Кир Стармер изјави дека израелската ескалација е „погрешна“ и дека „ќе донесе уште повеќе крвопролевање“.
Турското Министерство за надворешни работи ја повика меѓународната заедница да го запре израелскиот план, тврдејќи дека тоа е обид за „насилно протерување на Палестинците од нивната земја“.
Финската министерка за надворешни работи Елина Валтонен изјави дека се надева на „итно прекин на огнот во Газа и ослободување на израелските заложници“.
Израелскиот опозициски лидер Јаир Лапид ја нарече одлуката на безбедносниот кабинет да ја преземе контролата врз градот Газа „катастрофа“ што „ќе доведе до многу други катастрофи“.
Израелските медиуми објавија жестоки судири за време на 10-часовниот состанок на безбедносниот кабинет на кој беше одобрен контроверзниот план на премиерот Бенјамин Нетанјаху за проширување на воената офанзива во Газа.
Според порталот Ynet, началникот на Генералштабот на израелската армија, генерал Ејал Замир, остро се спротивставил на планот за целосно заземање на Газа, што во пракса значи окупација. Тој предупреди на можните последици од раселувањето на милион Палестинци кои живеат во областа, а кои би можеле да бидат погодени од нападите, како и на опасноста за дваесетината заложници за кои се верува дека се уште се живи.
Замир, исто така, предупреди на исцрпеноста на израелската војска по речиси две години војна, за време на која многу резервисти служеле во Газа повеќе пати.
Во Израел веќе се разви „голем јавен бунт“ против планот на премиерот Бенјамин Нетанјаху да го заземе градот Газа, изјави за Би-Би-Си израелскиот новинар Тал Шнајдер, политички дописник за „Тајмс оф Израел“.
„Незадоволството е огромно“, изјави таа за емисијата „Тудеј“ на BBC Radio 4. „Луѓето синоќа излегоа на улиците на десетици локации за да протестираат против владата“.
„Владата презема чекори кои се многу, многу непопуларни“, додаде Шнајдер.
Според неа, сите јавни податоци и анкети покажуваат дека мнозинството израелски граѓани се против таква воена ескалација, особено со оглед на фактот дека заложниците сè уште не се вратени.
„Нетанјаху се чини дека живее во меур, изолиран од реалноста“, рече таа. Таа, исто така, истакна дека израелската влада е „заробена во начин на размислување кој се базира исклучиво на сила, наместо да разгледува дипломатско или политичко решение“.