Уставниот совет при Врховниот суд на Венецуела донесе одлука потпретседателката Делси Родригез привремено да ја преземе функцијата шеф на државата, поради отсуството на претседателот Николас Мадуро, кој беше приведен вчера во американска воена операција.
Во официјалното соопштение се истакнува дека оваа мерка има за цел да се обезбеди непречено функционирање на државните институции и целосна заштита на националните интереси на Боливарската Република Венецуела.
Судските тела најавија дополнителна расправа за утврдување на правната рамка за управување со државата, функционирањето на владата и зачувувањето на суверенитетот во услови на принудно отсуство на претседателот.
Делси Родригез нагласи дека Николас Мадуро останува единствениот легитимен претседател на Венецуела. Таа реагираше на изјавата на американскиот претседател Доналд Трамп, кој тврдеше дека Родригез положила заклетва по одведувањето на Мадуро. Родригез се обрати до јавноста преку државната телевизија од Каракас, во присуство на претседателот на Националното собрание Хорхе Родригез, министерот за внатрешни работи Диосдадо Кабело, како и министрите за надворешни работи и одбрана.
Таа повика на смиреност, единство и заедничка одбрана на државата по, како што ја опиша, „отмичката“ на Мадуро, истакнувајќи дека Венецуела нема да се потчини на која било странска сила.
Од друга страна, Доналд Трамп изјави дека Соединетите Американски Држави ќе ја „водат Венецуела“ сè додека не се обезбеди безбедна транзиција на власта.
Ситуацијата во Венецуела останува крајно напната, со спротивставени толкувања на легитимитетот и меѓународни реакции што продолжуваат да пристигнуваат.