Педесет лица од трети земји, во рамките на соработката со Соединетите Држави, ќе прими привремената влада на Албин Курти во Косово.
„Лицата засегнати од оваа одлука, за време на нивниот престој во Република Косово, ќе постапуваат во согласност со важечкото законодавство и ќе ги уживаат правата утврдени со важечките закони“, објави привремената извршна власт по електронската седница одржана на 11 јуни, пренесува Радио слободна Европа
Привремениот премиер на Косово, Албин Курти на мрежата X напиша дека по донесувањето на оваа одлука косовските власти ќе работат „во тесна соработка со надлежните американски власти во текот на целиот процес“.
Портпарол на американскиот Стејт департмент за Радио Слободна Европа изјави дека САД се „благодарни на нашиот партнер, Косово, за прифаќањето на државјани од трети земји кои ќе бидат депортирани од САД“.
„Ја поздравуваме соработката по овој клучен приоритет на администрацијата на Трамп“, рече портпаролот.
Стејт департментот на 6 јуни за РСЕ потврди дека земјите од Балканот се вклучени во контакти како дел од пошироката стратегија на САД за депортирање на странски државјани без регулиран статус.
Портпаролот не одговори на конкретни прашања за тоа зошто е избрано Косово, кои критериуми се користеле за избор на мигрантите или дали Косово ќе добие поддршка или стимулации во замена за учество во овој договор.
Според привремените косовски власти „во период од една година, до 50 лица можат привремено да бидат преместени, со цел да се олесни нивното безбедно враќање во нивната земја на потекло. Владата изрази подготвеност да се ангажира, со можност за избор на лица од предложениот список, под услов да ги исполнуваат одредени критериуми поврзани со владеењето на правото и јавниот ред“, изјави за Радио Слободна Европа, Перпарим Криезиу, портпарол на привремената влада на Косово.