Шпанија ќе се обиде да даде нов поттик на одложениот предлог на ЕУ за укинување на сезонските промени на часовнивите и да побара од Брисел да го исполни своето ветување од пред 7 години за укинување на летното сметање на времето, објави Политико.
„Како што знаете, оваа недела (стрелките на) часовниците повторно ќе бидат поместени и, да бидам искрен, повеќе не ја гледам поентата во тоа“, рече шпанскиот премиер Педро Санчез во видео објавено во понеделникот
„Во сите анкети во кои се прашуваат Шпанците и Европејците, мнозинството се против промената на часовниците“, рече тој. „Понатаму, постојат многу научни докази што покажуваат дека тоа малку заштедува енергија и има негативно влијание врз здравјето и животот на луѓето.“
Претставниците на северните членки на ЕУ, вклучувајќи ги Финска и Полска, постојано изразуваат загриженост во врска со промената на времето, наведувајќи податоци што покажуваат дека практиката има негативни физички или ментални ефекти врз околу 20% од населението на Европа.
Всушност, 84% од 6,4 милиони Европејци кои учествуваа во јавната консултација на Европската комисија за ова прашање во 2018 година рекоа дека блокот треба да го укине летното сметање на времето.
Во својата објава на социјалните мрежи, Санчез рече дека е крајно време ЕУ да го спроведе предлогот што го објави тогашниот претседател на Европската комисија, Жан-Клод Јункер, за време на неговото обраќање за состојбата на Унијата во Европскиот парламент во 2018 година.
„Промената на часовникот мора да престане“, им рече Јункер на пратениците, инсистирајќи дека летното сметање на времето ќе биде прекинато најдоцна до октомври 2019 година. „Ни истекува времето“.
Но, предлогот на Јункер ги налути националните лидери, кои го доведоа во прашање овластувањето на Комисијата да предложи таква промена, а камоли да наметне краток рок за нејзино скапо спроведување.
Сега Санчез ќе треба да убеди 15 од 27-те земји-членки на ЕУ, или група земји што претставуваат најмалку 65% од населението на ЕУ, да ја поддржат идејата – и да се надева дека помалку од четири главни градови силно ќе се спротивстават на тоа.
Сезонското префрлање на летно сметање на времето за прв пат беше воведено во Европа за време на Првата светска војна за да се заштеди јаглен, но беше прекинато по завршувањето на конфликтот.
Слични енергетски загрижености ги наведоа повеќето земји повторно да ја воведат шемата за време на Втората светска војна и како одговор на глобалната нафтена криза од 1970-тите.
Сегашните правила на ЕУ, кои се во сила од 2001 година, предвидуваат дека земјите-членки на ЕУ ги поместуваат своите часовници еден час напред во 1 часот наутро во последната недела во март и еден час назад во последната недела во октомври.