Велика Британија и неколку европски сојузници денеска објавија дека рускиот опозициски лидер Алексеј Навални бил убиен со смртоносен токсин пронајден во кожата на јужноамериканските отровни жаби.
Траги од епибатидин се откриени во примероците од телото на Навални, за кои се верува дека ја предизвикале неговата смрт во сибирската казнена колонија пред две години, соопшти Министерството за надворешни работи на Велика Британија.
Сојузниците истакнуваат дека само руската држава имала „средства, мотив и можност“ да го употреби овој отров. Кремљ ги отфрли обвинувањата како „информативна кампања“, според новинската агенција ТАСС, пренесува Би-би-си.
Епибатидинот е природен невротоксин изолиран од кожата на еквадорската отровна жаба (Phyllobates terribilis). Токсикологот Џил Џонсон за Би-би-си објасни дека е „200 пати посилен од морфинот“.
Иако природно се среќава во дивината на Јужна Америка, може да се синтетизира и во лабораторија. Отровот не е присутен во Русија, нагласија европските сојузници.
Епибатидинот делува на никотинските рецептори во нервниот систем, предизвикувајќи прекумерна стимулација што води до мускулни грчеви, парализа, напади, забавен срцев ритам, респираторна инсуфициенција и на крајот смрт.
Професорот по еколошка токсикологија Аластер Хеј од Универзитетот во Лидс изјави дека отруеното лице „умира од задушување“, а присуството на токсинот во крвта „сугерира намерна администрација“.
Токсичноста може дополнително да се зголеми со комбинација со одредени лекови, што било испитувано во научни студии.
Европските лаборатории потврдија дека Навални починал од непознат отров, објавија сојузниците во саботата. Москва претходно тврдеше дека причината за смртта била природна, иако вдовицата Јулија Навална постојано инсистираше дека сопругот ѝ бил „убиен“ со труење.
Руската амбасада во Лондон ги отфрли обвинувањата како „измислица од западните фабулисти“ и „некропропаганда“.
Портпаролката на Кремљ, Марија Захарова, изјави за ТАСС дека станува збор за „информативна кампања насочена кон одвлекување на вниманието од итни проблеми на Западот“.
Навални помина три години во затвор, а непосредно пред смртта бил префрлен во арктичка казнена колонија. Според руските извештаи, 47-годишникот се почувствувал лошо по кратка прошетка, се срушил и никогаш не се освестил.