Американскиот претседател Доналд Трамп ја повтори својата закана да воведе царина од 10% за увоз од земјите во развој, членки на групата БРИКС.
„Никогаш нема да дозволиме никој да си игра игри со нас“, се закани тој, без да ги именува земјите во групата.
Трамп ги објави новите царини на 6 јули, велејќи дека тие ќе важат за секоја земја што се придржува до она што тој го нарече „антиамериканска политика“ на групата БРИКС.
Трамп постојано тврди, без докази, дека групата е создадена за да им наштети на Соединетите Американски Држави и на улогата на доларот како светска резервна валута.
Во февруари, Бразил се откажа од плановите да се залага за заедничка валута за време на своето претседателствување оваа година, но групата продолжува со работата на прекуграничен систем за плаќања, познат како BRICS Pay кој би го олеснил трговскиот и финансискиот систем во локални валути.
Групата БРИКС се прошири минатата година надвор од Бразил, Русија, Индија, Кина и Јужна Африка за да вклучи членови како Иран и Индонезија. Лидерите на самитот на групата во Бразил упатија индиректни критики кон американската воена и трговска политика.