Надежите на американскиот претседател Доналд Трамп за скора средба со рускиот претседател Владимир Путин можеби ќе бидат разбиени, откако подготвителниот состанок на клучните советници за надворешна политика на двајцата лидери е ставен на чекање. Извори запознаени со ситуацијата потврдуваат дека состанокот, планиран за оваа недела, засега е одложен, според извештаите на Си-ен-ен.
Трамп минатиот четврток, по разговорот со Путин, објави дека „се согласиле дека состанокот на нашите советници на високо ниво ќе се одржи следната недела“. Тој додаде на платформата Truth Social: „Првичните состаноци од Соединетите Американски Држави ќе ги води државниот секретар Марко Рубио, заедно со разни други кои ќе бидат утврдени“.
Сепак, очекуваната средба меѓу Рубио и неговиот руски колега Сергеј Лавров е одложена, потврдува официјален претставник на Белата куќа. Причината за оваа пауза не е веднаш јасна, но еден извор укажува дека Рубио и Лавров имале различни очекувања за можна завршница на руската инвазија во Украина. Не е познато како ова одложување ќе влијае врз планираниот самит меѓу Трамп и Путин во Будимпешта, но руското Министерство за надворешни работи изјави дека „не можеш да одложиш нешто што не било договорено“, додавајќи дека средбата бара дополнителни подготовки.
„Претседателот Трамп постојано работи на наоѓање мирно и дипломатско решение за да се стави крај на оваа бесмислена војна и да се запре убивањето“, изјави за Си-Ен-Ен заменик-портпаролката на Белата куќа, Ана Кели. „Тој храбро се ангажираше со страните од сите страни и ќе направи сè што е во негова моќ за да се постигне мир“.
Рубио и Лавров разговараа по телефон во понеделникот за „следните чекори“ по разговорот на двајцата претседатели минатата недела, фокусирајќи се на прекин на конфликтот во Украина, според краткото соопштение на Стејт департментот. Во него се истакнува дека Рубио „ја нагласил важноста на претстојните ангажмани како можност Москва и Вашингтон да работат заедно за да се постигне трајно решение за војната меѓу Русија и Украина, во согласност со визијата на претседателот Трамп“.
Кремљ го опиша повикот како „конструктивна дискусија“ што се осврнала на „можните конкретни чекори за спроведување на договорите“ постигнати меѓу Трамп и Путин. Сепак, извор запознаен со ситуацијата истакна за Си-ен-ен дека американските претставници по разговорите заклучиле оти руската позиција останува значително непроменета, придржувајќи се кон своите максималистички барања. Затоа, Рубио најверојатно нема да препорача одржување средба меѓу Трамп и Путин следната недела, иако не е исклучено тој и Лавров повторно да разговараат.
Минаа повеќе од два месеци откако Трамп и Путин се сретнаа лично во Анкориџ, Аљаска. Таа средба, што траеше речиси три часа, заврши без конкретни договори, иако лидерите забележаа одреден напредок.
Трамп оттогаш повеќепати јавно ги повика Киев и Москва „веднаш да ја запрат војната“. „Одете на фронтовската линија, каде и да е. Инаку, премногу е комплицирано. Никогаш нема да го сфатите. Застанете на фронтовската линија“, им порача Трамп на новинарите во саботата.