Американскиот претседател Доналд Трамп синоќа изјави дека би сакал да се сретне со рускиот претседател Владимир Путин само ако може да се очекува продуктивен самит, без да ги потврди медиумските извештаи за одложување или ставување во мирување на планираниот состанок во Будимпешта.
На прашање за наводната промена на плановите и дали тоа ќе влијае на неговата позиција околу потенцијалната продажба на крстосувачки ракети „Томахавк“ на Украина, Трамп одговори од Овалната соба: -Не сакам да имам залуден состанок. Не сакам да губам време, па ќе видиме што ќе се случи-.
Не е јасно дали Трамп се однесуваше на средбата со Путин или на прашањето за оружјето за Украина, но тој нагласи дека одлука сè уште не е донесена и дека ќе даде повеќе детали во следните два дена. Истовремено, тој го повтори својот став дека фронтот во Украина мора да се замрзне како услов за секој мировен процес.
Неколку американски медиуми претходно објавија дека средбата во унгарската престолнина, објавена од Трамп во четвртокот, сега изгледа сè понеизвесна. Политико, цитирајќи извори од Белата куќа, навести дека состанокот веќе не е во план по телефонскиот разговор меѓу американскиот државен секретар Марко Рубио и рускиот министер за надворешни работи Сергеј Лавров, кој се одржа во понеделникот. Си-ен-ен, пак, наведе дека самитот е ставен во мирување, а прелиминарната средба меѓу Рубио и Лавров – сметана за клучна подготовка – е одложена. Ен-би-си Њуз истакна дека разговорот бил „продуктивен“, но дека официјалните лица сметаат дека Москва и Киев сè уште не се подготвени за сериозни преговори. Вашингтон Пост, исто така, потврди дека нема планови за средба во блиска иднина.
Белата куќа и Стејт департментот не одговорија на барањата на ДПА за коментар. Трамп во четвртокот објави дека сака да се сретне со Путин во Будимпешта за да разговара за војната во Украина, без да прецизира датум, но навестувајќи дека би можело да се случи „во следните две недели“. Ова би била втората средба меѓу двајцата лидери по августовскиот самит во Аласка, кој не донесе напредок во преговорите.
Европските сојузници на Украина, вклучително и лидерите кои се собираат на самит на ЕУ и на состанокот на „коалицијата на подготвени“, ја поддржуваат позицијата за прекин на огнот без територијални отстапоци од страна на Киев. Изборот на Будимпешта како локација беше контроверзен во ЕУ поради блиските врски меѓу унгарскиот премиер Виктор Орбан и Москва.