Божиќните трошоци во Европската Унија се очекува нагло да пораснат во 2025 година, бидејќи инфлацијата малку ги зголемува цените, а регулаторите ги заоструваат стандардите за безбедност на играчките. Како што се приближува Божиќ и купувањето подароци е во полн ек, Германија се позиционираше како земја што ќе потроши најмногу за време на празниците во целата Европска Унија, според податоците од платформата Statista. За време на божиќната сезона во 2025 година, малопродажните трошоци во Германија треба да достигнат околу 85,24 милијарди евра. По неа следуваат Франција со околу 71,65 милијарди евра и Италија со повеќе од 43 милијарди евра.
Низ цела Европа, Велика Британија е предводник во трошењето, со прогнозиран раст од 3,5 проценти во однос на 2024 година, според истражувањето на PwC, и покрај побавниот почеток на празничната трговија. Сспоред податоците на Евростат подароците би можеле да бидат поскапи оваа година, бидејќи годишната инфлација во еврозоната се проценува на 2,2 проценти во ноември 2025 година, во споредба со 2,1 процент еден месец претходно.
- „Се очекува празничните трошења да одразат повнимателен пристап од страна на потрошувачите, со поголема чувствителност на цените и претпочитање прифатливи задоволства“, според најновата прогноза од Економскиот институт Мастеркард.
Кои се најпопуларните подароци во ЕУ?
Според институтот, козметиката, модата и електронските уреди се меѓу најчесто купуваните подароци за време на празничната сезона. Во последниот квартал од 2024 година, чешките граѓани потрошиле најмногу за козметика, додека Полјаците претпочитале накит и часовници. Шпанците, од друга страна, инвестирале најмногу во половни производи, додека Италијанците потрошиле најмногу пари за апарати за домаќинство. Чесите биле и најголемите потрошувачи на игри и играчки во споредба со другите европски земји.
Минатата година, козметиката и играчките беа производите кои најчесто се појавуваа на листата на предупредувања поради безбедносни проблеми во ЕУ, при што хемиските состојки се главна причина за ризик во речиси половина од пријавените случаи.
Индустриите за играчки на Европа (TIE), кои ја обединуваат европската индустрија за играчки, спроведе истражување на 70 играчки од првите страници на резултатите од пребарувањето на седум големи онлајн платформи кои снабдуваат стоки во Белгија и Франција.
Резултатите покажаа дека дури 96 проценти од тестираните играчки не се во согласност со безбедносните прописи на ЕУ, додека 86 проценти имале сериозни безбедносни дефекти, како што се мали делови што претставуваат опасност од задушување, силни магнети или лесен пристап до батерии. Во октомври оваа година, Европскиот совет усвои нови правила за безбедност на играчките, воведувајќи дигитален пасош за подобра контрола на играчките што се продаваат преку интернет, како и забранувајќи ја употребата на хемиски супстанции штетни за здравјето на децата.