Првиот осомничен е 34-годишен државјанин на Алжир, идентификуван преку ДНК траги пронајдени на скутерот што го користеле напаѓачите. Вториот, 39-годишен жител на париското предградие Обервиље, работел како нелегален таксист и доставувач, а бил познат на полицијата по претходни тешки кражби. Неговиот ДНК бил пронајден на стаклото од скршената витрина. Еден од нив бил уапсен на аеродромот Шарл де Гол, додека се обидувал да ја напушти земјата со лет за Алжир.
Според париската обвинителка Лора Беко, осомничените биле уапсени во саботата вечерта и испрашувани цели 96 часа, по што биле изведени пред истражен судија кој ќе одлучи за подигање на обвинение за вооружен грабеж во состав на организирана група – кривично дело за кое е предвидена казна и до 15 години затвор.
Кражбата, како што пренесе Index.hr, која траела само седум минути, се случила на 19 октомври во Галеријата Аполо, најраскошната просторија на Лувр каде се изложени француските кралски драгоцености. Четворица маскирани напаѓачи влегле преку прозорец користејќи камионска дизалица, скршиле две заштитни витрини и побегнале со девет вредни предмети проценети на околу 88 милиони евра.
Меѓу украдените се смарагдна огрлица со над илјада дијаманти, подарок од Наполеон за неговата сопруга, како и накит што ѝ припаѓал на кралиците Марија-Амелија и Хортенз.
Иако нема докази за вмешаност на вработени во музејот, обвинителката Беко нагласи дека се надева накитот ќе биде вратен: „Овие предмети се непроценливи и не можат да се продадат легално. Секој што ќе се обиде да ги купи ќе изврши кривично дело прикривање украдена стока.“
Во потрагата учествувале над сто истражители, кои анализирале повеќе од 150 ДНК примероци и предмети оставени на местото на злосторството – вклучувајќи ракавици, шлемови и рефлектирачки елеци. Двајца од осомничените се сè уште во бегство.
Случајот откри сериозни безбедносни пропусти во музејот. Началникот на париската полиција, Патрис Фор, признал дека системите за надзор биле застарени и дека дозволата за работа на безбедносните камери истекла уште во јули и не била обновена.
Дополнително, првата дојава за кражбата не дошла од алармниот систем, туку од случаен велосипедист, кој ги забележал крадците со шлемови и дизалица пред музејот и ја повикал полицијата.