Поранешниот грчки министер за финансии (2015, во времето на најголемата криза), економист и публицист Јанис Варуфакис изминатите денови престојуваше во Словенија, каде што во две распродадени вечерни програми во Цанкарев дом на публиката и ги претстави своите размислувања за општествените и економските предизвици на денешницата. Економист, универзитетски професор, автор и еден од најострите критичари на европскиот политички естаблишмент, тој говореше и во интервју за словенечката јавна телевизија.
Во интервјуто за словенечката јавна телевизија и пред публиката, Варуфакис не штедеше зборови:
„Единственото за кое нашето европско политичко водство — ако воопшто може така да се нарече — денес жали е тоа што не го извршиле сами геноцидот во Палестина. Беа само статисти. Други го правеа тоа, а Европејците беа соучесници. На чело со Урсула фон дер Лајен, која стоеше пред тенковите на израелските одбранбени сили непосредно пред нападот врз Газа, без никаков мандат или дозвола од кого било од нас во Европа.“
За Украина е подеднакво остар: „Европа нема план ниту за мир ниту за војна. Станавме мешавина од идиоти и кривци. Така не гледаат Индијците, Мексиканците, глобалниот Југ – а не само Трамп и Си.“
Варуфакис прогнозира дека 2025 година ќе остане запишана како година на фактичкиот распад на Европската Унија. „Богат континент сме со сиромашни луѓе. Осемдесет проценти од Европејците не можат да преживеат на еден богат континент. Тоа е исклучително зол и токсичен парадокс што создава незадоволство и ја храни ѕверката на неофашизмот, расизмот, исламофобијата и антисемитизмот.“
И покрај мрачната дијагноза, самопрогласениот „либерален марксист“ и коосновач на DiEM25 останува непоправлив оптимист: „Судбината на левицата е да преминува од еден пораз во друг. Во меѓувреме се надеваме дека ќе се случи чудо и дека еден ден ќе победиме.“