Врховниот суд на Бразил денеска ќе започне со сослушувањата во случајот против поранешниот претседател Жаир Болсонаро, обвинет за обид за државен удар по победата на неговиот наследник, левичарот Луис Инасио Лула да Силва, на изборите во 2022 година.
Доколку биде прогласен за виновен, Болсонаро би станал првиот поранешен претседател во историјата на Бразил осуден за обид за пуч. Заедно со него, обвинети се уште шест лица, кои се товарат дека се обиделе да ги поништат изборните резултати преку државен удар. Болсонаро ги отфрла овие обвинувања.
Според ДПА, обвинетите се соочуваат со потенцијални затворски казни од десетици години.
Сослушувањата ќе започнат со судијата Александре де Мораес, кој ќе го прочита извештајот од Канцеларијата на јавниот обвинител. Потоа, збор ќе земат јавниот обвинител Пауло Гонет и адвокатите на одбраната.
Петте судии од Првата комора на Врховниот суд ќе гласаат, при што за осуда е потребно мнозинство од три гласа. Сослушувањата се закажани за периодот до 12 септември, а пресудата се очекува следната недела.
Обвиненијата против Болсонаро, поранешни членови на неговиот кабинет и високи воени функционери, вклучувајќи го поранешниот министер за одбрана Пауло Серхио Ногеира, поранешниот шеф на морнарицата Алмир Гарние и тогашниот советник за безбедност Аугусто Хелено, се однесуваат на планирање државен удар по победата на Лула. Тие се соочуваат со обвиненија за обид за пуч, учество во вооружена криминална организација и оштетување на заштитени културни добра.