Украинсиот претседател го отфрли предлогот на Владимир Путин Украина да се повлече од Донецк и Луганск како дел од мировниот план поддржан од Доналд Трамп, објави Ројтерс.
Зеленски јасно стави до знаење дека таква опција не е можна.
По средбата со рускиот претседател Владимир Путин во Алјаска, Трамп разговараше со Зеленски повеќе од еден и пол час. Лидерите на НАТО и европските земји, исто така, се придружија на повикот.
Според извор запознаен со разговорот, Трамп му рекол на Зеленски дека Путин е подготвен да престане да се бори на други фронтови ако Украина се повлече од источниот дел на земјата.
Зеленски го отфрли ова, нагласувајќи дека нема повлекување од Донбас.
Фајненшл тајмс објави претходно дека Путин, на самитот со Трамп, побарал Украина да се повлече од регионот Донецк во замена за замрзнување на фронтот во регионите Херсон и Запорожје. „Њујорк тајмс“ потоа објави дека Трамп го поддржува планот и верува дека мирот може брзо да се постигне ако Украина се согласи да го предаде остатокот од Донбас, вклучително и областите што не се заземени од руските сили.
Mинатата недела Зеленски, исто така, јасно ја отфрли можноста за повлекување од Донбас.
„Ако денес се повлечеме од Донбас – од нашите утврдувања, од теренот и височините што ги држиме, очигледно ќе им го отвориме патот на Русите за нова офанзива“, рече украинскиот претседател.
Таквиот план би бил спротивен и на предупредувањата од европските лидери дека секој мировен договор мора да го почитува територијалниот интегритет на Украина и принципот дека меѓународните граници не можат да се менуваат со сила.
Таквиот предлог би барал и одобрение од украинскиот парламент.
Украинските функционери велат дека Зеленски нема да се согласи да ги предаде Донецк и Луганск, црвена линија за Киев, но е подготвен да разговара за територијалните прашања во Белата куќа во понеделник и на идната трилатерална средба со Трамп и Путин.
„Ова е нож во грб“, изјави висок украински функционер.
„Тој само сака брз договор“, додаде друг. Олександр Мережко, претседател на комисијата за надворешни работи на украинскиот парламент, го опиша состанокот со еден збор: „Ужасно“.
„Трамп практично се здружи со Путин, и двајцата сега би можеле да почнат да ја принудуваат Украина на мировен договор што ефикасно значи капитулација“, рече тој.