Неколку часа откако американскиот претседател Доналд Трамп побара од Украина да одржи претседателски избори, украинскиот претседател Володимир Зеленски рече дека ќе направи сè што е можно за да се одржат наскоро.
Зеленски, кој беше во Италија рече дека веднаш по враќање во земјата ќе побара предлози за законски измени за одржување избори за време на воена состојба.
„Ги молам САД да ми помогнат, можеби заедно со европските колеги, да обезбедам безбедност за време на изборите, а потоа во следните 60-90 дена Украина ќе биде подготвена да одржи избори“.
Претседателскиот мандат на Володимир Зеленски официјално истече на 20 мај 2024 година, но тој е претседател на Украина поради воената состојба во земјата како резултат на руската инвазија во февруари 2022 година.
Член 19, став 1 од украинскиот закон „За правниот режим на воената состојба“ забранува одржување избори (претседателски, парламентарни и локални) за време на периодот на воена состојба.
Во интервју за „Политико“, пред два дена, Трамп нагласи дека изборите треба да се одржат што е можно поскоро, а администрацијата на украинскиот претседател Володимир Зеленски намерно го одложува ова.
„Да, мислам дека е време. Важно е да се одржат избори. Тие ја користат војната како изговор да не се одржат избори, но мислам дека Украинците треба да имаат таков избор.
И можеби Зеленски ќе победи.
Не знам кој би победил, но тие долго време немале избори. Тие зборуваат за демократија, но во одреден момент таа престанува да биде демократија“, рече Трамп.