Свет

Кремљ ја укинува забраната за ликвидација на Зеленски и военото раководство?

Претставници на безбедносните служби побарале дозвола за физичка елиминација на највисокото воено и политичко раководство на Украина, пишува „Московски комсомолец“, руски весник близок до властите

 

Русија, наводно, ја укинала неофицијалната забрана за елиминација на украинскиот претседател Володимир Зеленски и раководството на Генералштабот на вооружените сили на Украина, јавуваат руски прорежимски медиуми.
Одлуката наводно била донесена за време на состанок зад затворени врати на рускиот Совет за безбедност, известија одредени руски медиуми и воено-политички канали на „Телеграм“, повикувајќи се на сопствени извори.

Според овие информации, претставници на безбедносните служби на состанокот побарале дозвола за физичка елиминација на највисокото воено и политичко раководство на Украина, пишува „Московски комсомолец“, руски весник близок до властите.

Извори тврдат дека одлуката е поттикната од тековните напади врз Ленинградската област – конкретно насочени кон извозен центар на Балтичкото Море и пристаништето Уст-Луга. Како дополнителна причина се наведува тврдењето – според руските наводи – дека Украина целосно преминала кон методи на меѓународен тероризам.

Изворите наведуваат дека руските безбедносни служби на состанокот побарале да се напушти претходниот премолчен договор според кој Зеленски и неговите соработници да не се напаѓаат.

Учесниците на состанокот на Советот за безбедност оцениле дека стратегијата на пасивна одбрана станала бесмислена.

Затоа, безбедносните служби предложиле порадикално решение – уништување на лицата кои издаваат наредби за напади врз руски цели.

Според советникот на украинскиот претседател, Михаило Подољак, на самиот почеток на инвазијата во февруари 2022 година, Русија планирала да постигне брза победа преку испраќање групи во украинскиот главен град Киев, со цел ликвидација на украинското раководство.

„Главната цел на Русија беше да го отстрани највисокото државно раководство, да предизвика што е можно поголема паника и да се обиде да воспостави своја марионетска влада“, изјави Подољак.

Порталот „Блокнот“ пренесува изјава од свој извор: „Или тајните служби и воздухопловните сили ќе добијат дозвола прецизно да ги уништат бункерите и конвоите на лидерите на киевската хунта со тешко хиперсонично оружје, или пак ќе продолжиме да плаќаме за нивната неказнивост со животите на нашите граѓани и со запалени фабрики“.

Во текстот се наведува дека самиот Зеленски е свесен за можноста против него да бидат преземени построги мерки. Тој речиси целиот изминат месец го помина на турнеја низ Европа – патување кое, според еден руски медиум, не било ништо повеќе од потрага по финансиски средства. Понатаму се додава дека Зеленски очигледно не брза да се врати во Киев…

Најнови вести од: Свет

To top