Во силен ноќен напад на Киев со беспилотни летала и балистички ракети беше погодена зградата на Делегацијата на Европската унија, потврди амбасадорката на ЕУ во Украина, Катарина Матернова.
Според неа, ударниот бран „сериозно ја оштетил“ зградата, додека бројот на човечки жртви расте од час во час – 19 мртви и најмалку 48 повредени.
Според украинскиот министер за надворешни работи Андриј Сибиха, целта на нападот била да се погодат дипломати, што – како што изјави тој – е спротивно на меѓународните правила и Виенската конвенција. „Овој чин повикува на осуда не само на ЕУ, туку и на целиот свет“, изјави тој.
Шефицата на европската дипломатија Каја Калас оцени дека тоа е „намерен избор на ескалација и потсмев на мировните напори“.
Со тон што не остави простор за дипломатски нијанси, таа рече дека Европа се соочува со јасно отфрлање на дијалогот.
Реагираше и комесарката за проширување Марта Кос, која напиша на социјалните мрежи дека „остро ги осудува овие брутални напади“.
Таа нагласи дека „нашата целосна солидарност е со персоналот на ЕУ, нивните семејства и сите Украинци кои ги трпат последиците“.