Премиерот и лидер на ВМРО-ДПМНЕ, Христијан Мицкоски, во гостување во емисијата „360 степени“ на МРТ 1, изрази очекување дека партијата ќе освои помеѓу 45 и 50 градоначалнички места, плус Скопје, на претстојните локални избори закажани за 19 октомври 2025 година, со можност за над 50. Тој истакна дека ова би било подобро од 42-те градоначалници од изборите во 2021 година, а според нивните анализи, СДСМ би добил од 0 до 6 места. За Левица, Мицкоски рече: „Не очекувам да освојат. Затоа што Левица, таму каде што кандидира свои кандидати, во најголем дел, а тоа се скопските општини и во градовите Тетово, Гостивар и Струга, теоретски не може да добијат поголем број гласови од кој било друг што се натпреварува на тие избори. Јасна е нивната стратегија, дека тие треба да бидат прокси за Демократската унија за интеграција.“
Во однос на советничките листи, Мицкоски очекува ВМРО-ДПМНЕ да освои 40-43% од гласовите, во споредба со 430.000 гласа од парламентарните избори на излезеност од над милион, но со можна дисипација поради независни листи и партии кои коалицираат на централно ниво, а самостојно во општини. „Се разбира дека гласовите на советничките листи се значајни и дека се некаков репер и патоказ, но очекувам да го освоиме тој процент помеѓу 40, 42-43 отсто од вкупниот број излезени гласачи. Тоа е во едно очекувано сценарио, иако кампањата сè уште не е почната, а очекувам дополнителна мобилизација од некој процент“, рече тој.
Мицкоски предвидува излезеност од 850.000 до 900.000 гласачи и над 400.000 гласа за ВМРО-ДПМНЕ, што би било историски најдобар резултат на локални избори. На прашањето за пад на поддршката од парламентарните избори, тој одговори негативно: „Не“, и додаде дека имаат дополнителен потенцијал, иако постои незадоволство од динамиката на реализација. „Се разбира дека во одредени кругови во јавноста можеби постои незадоволство од динамиката на реализација и испораката на резултатите. Некој ќе каже пребавно се случува, некој ќе каже апсете го овој, некој ќе каже судете го тој. Но, ние како Влада и како коалиција сме тука да испорачаме резултати и да одиме напред, а не да одиме назад како што тоа се случуваше во изминатите години. Ние не сме обвинители ниту, пак, судии… Ние можеме да направиме истрага и преку оние институции коишто ја вршат таа истрага да ја доставиме до Обвинителството. Од тој момент, па натаму правосудниот систем е тој што одлучува“, заклучи Мицкоски.